Таткото на бебето вели дека случајот го шокирал неговото семејство и инцидентот излегол на виделина кога болницата одбила да го предаде телото на бебето. Таткото никогаш не престанал да се обидува да ја дознае вистината за своето мртво дете, но бил шокиран кога ги видел останките на бебето откако го извадиле од машината за перење
Против гинеколошкото одделение на Општата болница во Пеќ, Косово е покрената истрага, откако било откриено дека некој од одделението по грешка го ставил телото на мртво бебе во машина за перење. Телото на детето било извадено од машината за перење на парчиња, пишува Косово онлајн.
Случајот го потврди и косовската полиција, која соопшти дека истрагата ја водат Државното обвинителство и Здравствениот инспекторат.
„За случајот што се случи во Регионалната болница во Пеќ била известена полицијата и веднаш излегла на местото на настанот, државниот обвинител исто така. На лице место излегле и здравствени инспектори. Случајот го истражуваат државниот обвинител и здравствените инспектори“,
соопшти полицијата.
Таткото на бебето вели дека болницата не сакала да го предаде телото
Извори од болницата во Пеќ велат дека болницата по секоја цена се обидува да го прикрие случајот и дека се врши притисок врз персоналот да не излезат информации од болницата. Косово онлајн пишува дека имало обиди дури и вината да се префрли на собарките, за да не излезе во јавноста името на медицинскиот персонал од гинекологија.
Таткото на бебето вели дека случајот го шокирал неговото семејство и инцидентот излегол на виделина кога болницата одбила да го предаде телото на бебето. Таткото никогаш не престанал да се обидува да ја дознае вистината за своето мртво дете, но бил шокиран кога ги видел останките на бебето откако го извадиле од машината за перење.
Болница: 7 вработени се суспендирани и поведена е дисциплинска постапка
Во меѓувреме, Општата болница во Пеќ на својата веб-страница објави дека за овој случај се суспендирани седуммина вработени и дека против нив е поведена дисциплинска постапка.
„Случајот се уште е во фаза на истрага и штом истражните органи и здравствената инспекција излезат со наодите и завршната постапка, јавноста ќе биде информирана за деталите и соодветните мерки предвидени со закон“,
се вели во соопштението на болницата.
„Ние сме во почетна фаза на истрага и не можеме да споделиме повеќе информации поради чувствителноста на случајот. Обвинителот се сретна со родителите на бебето и ги информираше за целиот случај“,
изјави портпаролот на Основното обвинителство во Пеќ.