Зборови како „султан“, „оџа“, „светилиште“, „бег“ исчезнуваат од имињата на местата и се заменуваат со нови кои ги содржат термините „хармонија“ и „среќа“, што, според ХРВ, ја одразува „неодамнешната идеологија на кинеската комунистичка партија“
Кина ги сменила имињата на стотици села во регионот Синџијанг населен со претежно муслиманско население познато како Ујгури со цел да ја избрише нивната муслиманска култура, соопшти организацијата за човекови права „Хјуман рајтс воч“, пренесува Би-би-си.
Според извештајот на организацијата, имињата на стотици села во Синџијанг поврзани со религијата, историјата и културата на Ујгурите биле заменети со нови во периодот меѓу 2009 и 2023 година.
Во последните години, кинеските власти спроведуваат радикални општествени промени во регионот, што според извештаите е обид на Пекинг да го асимилира малцинското ујгурско население во главните текови на кинеската култура.
Од друга страна, кинеската амбасада во Лондон ги негирала ваквите обвинувања.
Инаку, истражувачите на „Хјуман рајтс воч“ (ХРВ) и на норвeшката организација „Ујгур Хјелп“ (Uyghur Hjelp) изминатите 14 години ги проучувале имињата на селата во Синџијанг користејќи податоци од веб-страницата на Националното биро за статистика на Кина.
Откриле дека имињата на 3 600 од 25 000 села во овој регион биле променети во овој период.
Според ХРВ, иако поголемиот дел од тие промени се навидум секојдневни, околу една петтина или 630 промени, ги отстрануваат референците на ујгурската религија, култура или историја.
Зборови како „султан“, „оџа“, „светилиште“, „бег“ исчезнуваат од имињата на местата и се заменуваат со нови кои ги содржат термините „хармонија“ и „среќа“, што, според ХРВ, ја одразува „неодамнешната идеологија на кинеската комунистичка партија“.
Организацијата во извештајот како пример го посочува случајот со селото Ак Мешит (Бела џамија) во округот Акто, југозападно од Синџијанг“, кое во 2018 година било преименувано во „Единство“.
Повеќето од кинеските муслимани – Ујгури живеат во северозападниот дел од земјата, во областите Синџијанг, Чингхаи, Гансу и Нингсија.
Портпаролот на кинеската амбасада во Лондон, во изјава за Би-би-си, ги негирал обвинувањата.
„Луѓето од сите етнички групи уживаат верски слободи согласно законот. Јазиците и културите на Ујгурите и другите етнички малцинства се заштитени и промовирани“,
изјавиле од амбасадата.
Во Кина живеат околу 20 милиони муслимани.