Победникот на претседателските избори во САД, Џо Бајден, почна да го формира тимот кој ќе биде дел од неговата администрација. Веќе формираше 12-член тим за борба против ковид-19, а официјално беше потврдено и дека паднала одлуката кој ќе биде шеф на неговиот кабинет.
Меѓутоа, американските медиуми веќе почнаа да пишуваат и кој с би можел да застане на останатите клучни позиции во администрацијата на новоизбраниот претседател Џо Бајден и потпретседателката Камала Харис.
Хилари Клинтон е едно од имињата кое се споменува дека ќе добие позиција. Таа е поранешната прва дама на САД и државна секретарка во мандатот на Барак Обама, како и противкандидатка на Доналд Трамп на изборите во 2016, а сега се споменува како можна амбасадорка на САД во Обединетите нации (ОН).
Хилари Клинтон, како што објави „Индипендент“, моментно е главен кандидат на Бајден за амбасадорска функција.
За истата позиција, пак, претходно „Си-ен-ен“ лицитираше со името на Пит Бутиџиџ. Тој е поранешен градоначалник на Саут Бенд, Индијана, а беше и еден од противкандидатите на Бајден во внатрепартиската трка на демократите за номинацијата за претседателски кандидат. Бутиџиџ ѝ стана познат на пошироката јавност по тоа што беше првиот јавно деклариран хомосексуалец што влезе во кампањата за претседател на една голема партија во САД.
На листата која ја објави „Си-ен-ен“ има уште еден противкандидат на Бајден во внатрепартиската трка, кој сега би можел да добие висока позиција. Станува збор за сенаторот од Вермонт, Берни Сандерс. Сандерс беше последниот што остана во трката со Бајден за номинација за кандидат за претседател на Демократската партија, а откако се повлече, му ја даде својата поддршка.
Тој, според „Си-ен-ен“, би можел да биде новиот секретар за труд. Медиумот пренесува и неодамнешна изјава од Сандерс во која вели дека ако Бајден го замоли да биде дел од неговиот кабинет, тој ќе ја прифати понудата. Меѓутоа, за оваа позиција истиот медиум наведува уште три имиња кои се во игра.
Меѓу имињата за новите високи функционери се споменува и Мишел Флурној, која би можела да биде секретарка за одбрана. Токму од оваа позиција, Трамп пред неколку дена, односно два дена откако стана извесно дека изгубил на изборите, направи промени разрешувајќи го Марк Еспер и назначувајќи го Кристофер Милер за прв човек на Пентагон.
Флурној, наведува „Си-ен-ен“, би можела да биде првата жена на оваа позиција. Во администрацијата на Обама, каде Бајден беше потпретседател, таа беше заменик-секретар за одбрана, а во 1990-тите била и заменик-помишник секретар за одбрана.
Како државен секретар на САД, позицијата на која во моментов се наоѓа Мајк Помпео, пак, се споменуваат три имиња. Едно од нив е Сузан Рајс, која беше амбасадорка на САД во ОН и советник за национална безбедност во администрацијата на Обама. На листата кандидати за функцијата е Антони Блинкен, кој беше заменик-државен секретар, исто така во администрацијата на Обама, а на Бајден, како тогашен потпретседател, Блинкен му беше советник за национална безбедност.
Сенаторот од Делавер, Крис Кунс, е третото име со кое се лицитира за државен секретар. Тој моментално во Сенатот го држи местото на кое Бајден беше со децении, а двајцата важат за долгогодишни сојузници.