Сигурна и ефикасна вакцина ќе биде единственото средство што ќе овозможи да се врати чувството за нормалност во светот, изјави синоќа генералниот секретар на Обединетите нации (ОН), Антонио Гутереш, изразувајќи надеж дека тоа ќе се случи пред крајот на годината, пренесоа француските медиуми.
„Таквата вакцина ќе спаси милиони човечки животи и ќе заштеди милијарди долари“,
рече тој во видеоконференцискиот разговор со претставници на педесетина африкански земји.
Првиот човек на ОН ги поздрави напорите на неколку африкански влади за олеснување на последиците од пандемијата.
Меѓу нив тој ги посочи Уганда, која го одложи плаќањето на данокот за бизнисот, Намибија, која им дава помош на луѓето кои ја загубиле работата, како и Кабо Верде, која обезбедува помош во храна и Египет, која ги намали даноците во индустријата.
