Барањето е испратено до Владата, Министерот за образование и наука, Бирото за развој на образованието, УНИЦЕФ, Меѓаши и Народниот правобранител и во него се бара од понеделник 19.12.2022 година образовниот процес во Република Северна Македонија да продолжи со настава од далечина без исклучок
Членовите на групата „Поддршка за онлајн настава“ , како резултат на повеќемесечниот притисок врз учениците со низата дојави за поставени бомби во основните и средните училишта, бараат од понеделник 19.12.2022 година образовниот процес во Република Северна Македонија да продолжи со настава од далечина без исклучок.
Во барањето испратено до Владата, Министерот за образование и наука, Бирото за развој на образованието, УНИЦЕФ, Меѓаши и Народниот правобранител се вели дека целата состојба ги засега сите граѓани во Република Северна Македонија, но дека мора да се заштитат идните генерации и да се изнајде оптимално решение, а во овој момент тоа е само он лајн настава.
„Повеќе месеци децата како и нивните фамилии се експонирани на постојан страв, стрес и паника кој секојдневно зема се поголем замав. За жал мораме да констатираме дека образовниот процес во Република Северна Македонија е прекинат повеќе месеци, со што директно им се одзема уставно загарантираното право на образование на децата. Во соседството, поточно Република Србија и Црна Гора соочувајќи се со истиот вид на хибриден притисок како кај нас, идните генерации ги заштитија, исто така, со воведување на он лајн настава со што образовниот процес е продолжен во континуитет. Оттука, сакаме да подвлечеме дека зад ова барање стојат луѓе и семјества кои се обединети кон една цел – здравјето, безбедноста и образованието на своите деца, без разлика на нивната етничка, религиозна, партиска и каква било друга припадност“,
се наведува во барањето од членовите на групата „Поддршка за онлајн настава”.