Според првиот потпретседател на Владата и министер за политички систем и односи меѓу заедниците, Артан Груби кај опозицијата има луѓе кои сакаат да се продолжи со евроинтеграцијата на земјата и да ги поддржат уставните измени во параламентот. Темата за референдумот ја туркаат политичари кои се обидуваат да го продолжат опстојувањето во политиката, изјави Груби по завршување на Школата за млади лидери организирана како дел од одбележувањето на годишнината од рамковниот договор.
„Мојот личен став и ставот на Владата е дека нема алтернатива за европска Македонија. И затоа придонес треба да дадат сите, бидејќи апсолутно сите граѓани, сите заедници, сакаат да ја видат нашата држава како членка на Европската унија. На ист начин, како што бевме заедно кога ја зачленуваме земјата во НАТО. Па така, треба да разговараме со пратениците од опозицијата кои ќе гласаат за уставните измени, а такви ги има. За ова треба да се разговара, а не за дневно политички теми како што е референдумот, кои им служат на одредени политички актери за одржување во живот,“
изјави првиот вицепремиер Груби.
Во однос на прашањето за бугарските барања Груби го повтори ставот на министерството за надворешни работи дека нема никакви нови документи и други нови очекувања освен постигнатото во добрососедскиот договор.
„Останува истото што ѝ беше објаснето на јавноста и она што беше усвоено од Собранието на Северна Македонија. Граѓаните мора да бидат убедени и да ѝ веруваат на политичката елита во земјава дека ништо лошо нема да им се случи на моите сограѓани Македонци по однос на нивниот јазик, историја, култура и идентитет. Тоа нема да го дозволиме. Апсолутно тврдам, нема нови барања, ниту некакви нови документи“
потенцира Груби.