Мерката важи и за посетителите и за туристите во земјата
Од понеделник се забранува влез во затворени простори за лицата над 60 години кои не примиле трета доза, а поминале седум месеци од вакцинацијата, а од февруари се намалува важноста на потврдата за прележан ковид-19 од шест на три месеци.
Ова се двете нови мерки во Грција, а важат и за посетителите и туристите во земјата, потврди портпаролот на грчката влада Јанис Иконому на денешниот редовен брифинг со новинарите, јави МИА.
Со оглед на тоа дека пракса во Грција е сите мерки да важат за сите, без разлика дали се грчки државјани или туристи, истото ќе важи и сега, а според тоа и за македонските државјани за време на нивниот престој.
„Промените се однесуваат на сите кои се наоѓаат на грчка територија и за двете мерки. Во однос на навршувањето седум месеци за сограѓаните кои се над 60 годишна возраст и немаат примено бустер доза, без разлика дали се грчки граѓани или граѓани на други земји кои во нашата земја се наоѓаат од други причини, важи токму истото, нема да ги имаат привилегиите на вакцинираните. Во однос на потврдата за прележан Ковид-19, од 31 јануари, односно по 1 февруари, им даваме еден неопходен временски период за да се приспособат и да имаат можност да се вакцинираат, ќе важат токму истите правила и за Грците и за граѓаните на други земји“,
објасни Иконому.
Последната министерската одлука со предусловите за влез во земјата, која предвидува задолжителен сертификат за вакцинација или негативен ПЦР/рапид-тест или потврда за прележан ковид-19 во изминатите шест месеци, која воедно важи и за македонските државјани, беше објавена минатиот петок и во сила е до утре наутро.
Од понеделник лицата над 60 години кои не примиле трета доза, а поминале седум месеци од вакцинацијата, според Иконому, „нема да ги имаат привилегиите што ги имаат вакцинираните“ и за нив ќе важат „истите рестрикции како и за невакцинираните“.