Црквите ќе останат затворени со исклучок на Божик (25 декември) и Водици (6 јануари) кога ќе биде дозволено присуство на верници, односно до девет лица во црквите и најмногу 25 лица во поголемите храмови
Фризерските салони и книжарниците се единствените бизниси во Грција што ќе почнат со работа, додека продавниците ќе работат само со подигање на нарачка, а полицискиот час, СМС-пораките за движење и постоечките рестрикции во земјата се продолжени до 7 јануари, јави МИА од Атина.
Новите мерки и одлуки денеска ги соопштија портпаролот на грчката влада Стелиос Пецас и министерот за развој и инвестиции на Грција, Адонис Георгиадис.
Според грчката влада, иако земјата е пет седмици во карантин, епидемиолошката слика и понатаму е лоша и затоа се донесени новите одлуки.
Полицискиот час, наместо од 21 часот, од недела, ќе биде од 22 часот до пет часот наутро, додека пак црквите ќе останат затворени со исклучок на Божик (25 декември) и Водици (6 јануари) кога ќе биде дозволено присуство на верници, односно до девет лица во црквите и најмногу 25 лица во поголемите храмови.
Од понеделник се отвораат фризерските салони и книжарниците и ќе работат под строги правила и прописи, додека пак сите продавници ќе останат затворени до 7 јануари, а од недела се воведува можноста да бидат отворени само за подигнување на нарачка. Ова е поради зголемениот обем на работа на компаниите за достава, а министерот за развој и инвестиции на Грција, Адонис Георгиадис, објасни дека услугата „клик авеј“ (click away) значи направена нарачка, преку интернет или телефонски, плаќање онлајн или со картичка и подигање на нарачката во специјално одреден простор, на отворено, пред продавницата.
Во редицата пред продавниците не смее да има над девет лица, со најмалку два метри растојание меѓу нив, а за подигнување на нарачката граѓаните ќе добиваат потврда со податоци на продавницата и точно закажан термин и нема да биде дозволен влез во внатрешноста ниту, пак, подигнување на купените производи на повеќе од едно лице.
За подигање на нарачката ќе биде потребно и испраќање СМС-порака, истото што важи и за посета на супермаркет или аптека, а ќе важи и за фризерските салони.
Ако не се почитуваат правилата и мерките, ќе се укине и ќе се повлече конкретната услуга.
До 7 јануари 2021 година во Грција остануваат затворени училиштата, трговските центри, рестораните, таверните, кафулињата и баровите, спортските и фитнес-центрите, а движењето на граѓаните и понатаму ќе биде само по претходно испратена СМС-порака со избрана една од шесте опции.
Грчката влада на 7 ноември воведе карантин во целата земја, кој првично требаше да трае само 23 односно до 30 ноември, а дополнително беше продолжуван.
Од почетокот на епидемијата во Грција се регистрирани 3 370 смртни случаи од ковид-19 и 121 253 заразени лица.