Украинскиот претседател и премиерот на Грција синоќа потпишаа и заедничка декларација за евроатлантскиот пат на Украина. Во документот потпишан од Мицотакис и Зеленски се наведува дека двете земји ја потврдуваат својата посветеност за зајакнување на заедничките напори во поддршката на интеграцијата на Украина во НАТО и спроведувањето на стандардите на Алијансата
Грција ќе учествува во обуката на украински пилоти за борбените авиони Ф-16, соопштија премиерот на Грција, Киријакос Мицотатис, и украинскиот претседател Володимир Зеленски по синоќешната средба во Атина.
За време на заедничката прес-конференција, Зеленски се заблагодари и за помошта што Грција ѝ ја понудила на Украина во форма на нов одбранбен пакет за украинските сили.
Мицотакис, пак, истакна дека Грција ќе помогне во обновата на Украина, со фокус на градот Одеса.
Дополнително, двајцата лидери синоќа во Атина потпишаа и декларација за евроатлантскиот пат на Украина.
Во документот потпишан од Мицотакис и Зеленски се наведува дека двете земји ја потврдуваат својата посветеност за зајакнување на заедничките напори во поддршката на интеграцијата на Украина во НАТО и спроведувањето на стандардите на Алијансата.
Нагласиле и дека безбедноста на Украина е „витална за стабилноста на евроатлантската област“.
За време на заедничката прес-конференција во Атина, грчкиот премиер Мицотакис вети оти Грција ќе остане на страната на владата и херојскиот народ на Украина и ќе учествува во проектот за обнова на оваа земја во повоениот период.
„Никој не ги заборава злосторствата во маченичкиот Мариопол, истото важи и за Одеса, како и за Киев и другите региони на вашата земја“,
рече Мицотакис и додаде дека Грција безусловно ги осудува воените злосторства во Украина.
Мицотакис синоќа во премиерската палата во Атина организира неформална вечера за лидерите од регионот, а освен нив на средбата присуствуваа и украинскиот претседател Володимир Зеленски, како и челниците на Европската Унија – шефицата на ЕК, Урсула фон дер Лајен, и претседателот на Европскиот совет, Шарл Мишел.