Вкупно 33 600 дози од вакцината „Џонсон и Џонсон“ в среда ќе добие Грција, а од следната недела ја стави во употреба како дел од планот за имунизацијата на населението против ковид, јави МИА од Атина.
Во Грција, досега е постигнатата 14 отсто имунизациска покриеност со првата и седум проценти со втората доза, соопшти генералниот секретар на Министерството за здравство на Грција Мариос Темистоклеус.
На редовната прес конференција, Темистоклеус рече дека досега во Грција се спроведени 2 212 000 вакцинации, 1 428 000 граѓани ја примиле првата доза од вакцината (14 отсто), а 743 000 лица веќе се ревакцинирани, односно седум отсто имунизациска покриеност.
Темистоклеус соопшти дека во петок ќе започне пријавувањето за вакцинација на лица од 18 до 59 годишна возраст со хронични болести, на 21 април, платформата ќе се отвори и за просветните работници и лицата на возраст од 55 до 59 години, а три дена подоцна и за оние од 50 до 54 години за да закажат термин за имунизација.
Од саботата, пак започна пријавување за вакцинација на граѓани на возраст од 60 до 64 години.
„Се надеваме дека ако сè оди по планот и компаниите ги почитуваат роковите за достава, во следниот период ќе отвориме и други возрасни групи, за во јуни да можеме да вакцинираме и помлади сограѓани“,
рече Темистоклеус.
Процесот на имунизација во Грција се врши со вакцините на „Фајзер“, „Модерна“ и „Астра Зенека“, која е наменета за лица над 30 години.