Според Грковска, за успех во справувањето со корупцијата и организираниот криминал треба да се користат сите расположливи механизми и во таа насока го најави формирањето Регионална академија за добро управување, со седиште во Скопје
Нашиот регион е систем на врзани садови и не можеме да имаме успех во антикорупциските прашања и борбата со организираниот криминал само на локално, национално ниво, заради тоа што криминалците се прилично добро вмрежени и поврзани, истакна вицепремиерката задолжена за политики за добро владеење Славица Грковска во интервју за емисијата „Recite Al Jazeeri“ на Ал Џезира Балкан.
Во интервјуто, вицепремиерката Грковска ја истакна Регионалната антикорупциска иницијатива – РАИ, како една од суштинските платформи за регионално зајакнување во справувањето со корупцијата. Оваа регионална иницијатива, како што посочи Грковска, е посветена на градење мрежа за заемна поддршка на жените од регионот, кои се вклучени во антикорупциските напори и кои поради тоа се соочуваат со напади, етикетирања и дезинформации на родова основа.
Според Грковска, за успех во справувањето со корупцијата и организираниот криминал треба да се користат сите расположливи механизми и во таа насока го најави формирањето Регионална академија за добро управување, со седиште во Скопје.
Во поглед на ниската доверба во правосудниот систем, вицепремиерката Грковска истакна дека самите обвинители и судии мора да се изборат за својата независност и да не се солидаризираат со колегите кои ја создаваат перцепцијата за неправичност и двојни аршини во постапувањето.
„Вистинската храброст е да се држите точно до законот и да постапувате непристрасно кога станува збор за коруптивни случаи од високата политика и бизнисот“,
истакна Грковска.