Димитров на заедничката прес-конференција оцени дека со грчкиот колега, кој е во прва посета на Северна Македонија, имале срдечна пријателска средба која за него е силен сигнал дека Грција ни дава поддршка на нашата интеграција во ЕУ
Грчкиот алтернативен министер за надворешни работи задолжен за европски прашања Милтиадис Варвициотис, кој е во работна посета на Северна Македонија, од земјава упати порака дека првата меѓувладина конференција за почеток на преговорите со ЕУ треба да се свика веднаш. Како со нашата земја, така и со Албанија.
„Големо задоволство ми е што се наоѓам во Скопје за да се сретнам со вицепремиерот, мојот пријател Никола Димитров. За нас европската перспектива на Западен Балкан е национална политика која ја спроведуваме скоро две децении. Сметаме дека чекорите во оваа насока од страна на Европа треба да бидат брзи и одлучни. Затоа ги поздравуваме затоплувањата во однос на проширувањето објавени од Самитот Брдо во Словенија. Сметаме дека треба веднаш да се свика меѓувладината седница за двете земји, Албанија и Северна Македонија, така што да се расчистат позициите за следните чекори во преговорите, како и за евентуалните забрзувања на преговорите како за Србија така и за Црна Гора“,
рече Варвациотис на заедничка прес-конференција со вицепремиерот за европски прашања, Никола Димитров.
Тој потсети дека од ЕУ веќе се насочени повеќе од 30 милиони евра за да реформи и економски напредок во регионот, а изрази подготвеност и Грција да помогне со своето техничко знаење во процесот на евроинтеграцијата на Северна Македонија.
„Подготвени сме да учествуваме во сите аспекти, но и да ги поддржиме нашите економски соработки во духот на пријателството, меѓусебното разбирање и добрососедските односи. Добрососедските односи сигурно се потпираат на довербата и правилното спроведување на Договорот од Преспа, нешто за што разговараме со мојот колега“,
рече грчкиот министер за на крај уште еднаш да упати порака дека Грција сака ЕУ да се прошири и да ги прими сите земји од регионот во Унијата.
Димитров, пак, оцени дека со грчкиот колега, кој е во прва посета на Северна Македонија, имале срдечна пријателска средба која за него е силен сигнал дека Грција ни дава поддршка на нашата интеграција во ЕУ.
„Имавме отворена, срдечна пријателска средба како што доликува на новото поглавје на односите меѓу Грција и северна Македонија. Разговаравме пред сè за европската иднина на Балканот. Оваа посета за мене е сигнал на грчката поддршка, таа ја гледаме и во Брисел, ја видовме и на Самитот во Брдо и во јавни изјави на премиерот Мицотакис и во вашите изјави и за тоа сме благодарни. Разговаравме и врз основа на Меморандумот за разбирање што го имаме со Грција, за забрзување на евроинтегративните процеси за Република Северна Македонија, за тоа како да имаме поголема соработка меѓу нашите и вашите институции во оваа смисла и мислам дека имавме еден плоден разговор“,
рече Димитров.