Уредите за биометриска идентификација на гласачите својата „премиера“ ја имаат денеска зашто немаше време за пилот-проверка
Познатиот македонски уметник, сликар, графичар и дизајнер, Зоран Кардула, сведочи за негативно искуство со уредите за биометриска идентификација на гласачите со чија помош денеска треба да се одвива гласањето. Тој на својот фејсбук профил вели дека фингерпринт-уредите не можат да ги идентификуваат гласачите со отисок, а не функционираат дури ни ако дополнително во нив се стави и лична карта.
„Гласав, но морам да напишам дека апаратите за идентификација ‘фингерпринт’ се чиста глупост и пари фрлени. Голем дел од гласачите не ги идентификува со отисок, па дури и со користење на лична карта во самиот апарат, како што беше и во мојот случај и, на крај, одобрено ми беше гласање со отисок од прст на самиот список. Така што, пак ќе кажам – огромни пари фрлени“,
напиша Кардула на својот фејсбук профил.
Уредите за биометриска идентификација на гласачите својата „премиера“ ја имаат денеска, оти немаше време за пилот-проверка како би изгледал новиот начин на гласање. Од дел од избирачките места се пријавуваат проблеми со уредите, но претседателот на Државната изборна комисија, Александар Даштевски, вели дека тие тековно се решаваат, а во случаите каде поради лоши отпечатоци не може да се идентификуваат гласачите со уредот, гласањето се реализира со оставање отпечаток во хартиениот избирачки список во кој се запишани.