Апликацијата „МОЈДДВ“ до сега ја имаат симнато 58 илјади корисници на мобилни телефони, а очекувањата се бројката да достигне половина милион, извести денеска директорката на Управата за јавни приходи, Сања Лукаревска.
„До сега се обработени 433.204 сметки. По првите пет дена од стартот на проектот „МојДДВ“, граѓаните до сега имаат „заработени“ 120.000 евра од скенирањето на фискалните сметки со своите мобилни телефони“,
изјави Лукаревска.
Инаку, според пресметките, за поврат од 600 денари месечно, едно лице треба да оствари промет од 26.600 денари, доколку сите сметки се со 18 проценти ДДВ.
„Првата исплата на парите од ДДВ граѓаните може да ја очекуваат во декември – за месеците јули, август и септември. Исплатата ќе се врши квартално и едно лице може да поврати максимум 1.800 денари за три месеци“,
информира Лукаревска.
Од УЈП информираат дека се работи на надминување на проблемот на сопствениците на телефоните „Iphone“, кои и натаму не можат да ја симнат апликацијата, поради рестриктивните правила на „Apple“.
„Уште на 25 мај годинава УЈП контактираше со претставништвото на „Apple Store“ и побара одобрение оваа апликација да биде ставена на нивниот сајт. Постапката, поради нивните правила се одолговлече, но очекуваме во секој момент таа да биде достапна и за овие корисници“,
велат од УЈП.
Граѓаните кои имаат проблем со скенирањето на фискалните сметки, можат да го надминат ако ги донесат до апаратите на киосците и бар-код читачите во регионалните и во подрачните канцеларии на УЈП.
Директорката на УЈП укажа дека се забележуваат и се поголем број пријави од граѓани за трговци кои не издаваат фискални сметки а инспекциските служби веќе вршат проверка на работата на тие субјекти.