Засега се разгледуваат мерки како носење маски и на отворено, ограничување на бројот на присутни во угостителски објекти, казни за семејни прослави и групирања во затворен простор и ограничување на лицата во јавниот превоз, ако е неопходно, и рестрикции на движењето
Здравствените власти разгледуваат евентуално воведување нови мерки за спречување на ширењето на коронавирусот.
Министерот за здравство Венко Филипче, на денешната прес-конференција, рече дека тоа би било носење маски на отворено, ограничување на бројот на присутни во угостителски објекти, казни за семејни прослави и групирања во затворен простор и ограничување на лицата во јавниот превоз.
Засега, потенцира Филипче, нема потреба од воведување вакви мерки на ниеден дел од територијата на државата, но предупреди дека ќе се преземат мерки ако има влошување на состојбата. Целта е да се избегне воведување на целосно затворање, но рече дека ако е нужно ќе се направи и тоа.
„Нашата стратегија е навремено да воведеме мерки кои директно ќе влијаат на сузбивање на ширење на вирусот за да се избегнат рестрикции на движењето или мерки кои би ја закочиле економијата и би нè затвориле во своите домови, но ако е нужно ќе го направиме и тоа“,
рече Филипче.
Зголемувањето на бројот на новозаразени главно се должи на непочитување на мерките, пред сè групирање, семејни собири, прослави, свадби кои се забранети и генералното опуштање на граѓаните.
Особено туку потенцира дека евидентен е порастот на новозаболени кај лицата од 30 до 39 години, кои одат на работат и имаат социјален живот.
Тој најави дека сите инспекторати и институции интензивно ќе работат и апелира да се сфати ситуација многу сериозно, со неопходно почитување на мерките за заштита и од граѓаните и од угостителските објекти.