Со усвоените предлог-измени на Изборниот законик, дополнително се овозможува граѓаните кои наполниле 18 години заклучно со денот на изборите, односно помеѓу двата изборни круга, да може да гласаат приложувајќи документ за лична идентификација
Граѓаните чии лични карти и патни исправи се со истечена важност во периодот од девет месеци до денот на одржување на изборите ќе може да го остварат своето уставно загарантирано право на глас на претстојните претседателски и парламентарни избори. Ова произлегува од преодните измени на Изборниот законик (ИЗ) кои денеска по скратена постапка беа усвоени од мнозинство од вкупниот број на пратениците во Собранието.
Предлог-измените на Изборниот законик, со кои, меѓу другото, времено се отстрануваат ограничувањата врз основа на истечените документи за идентификација на изборите, во парламентот беа усвоени со 84 гласа „за“, додека двајца пратеници гласаа „воздржано“.
Во овој контекст, измени ќе претрпи членот 41 став 4 од Изборниот законик.
Па така, од досегашната одредба – „Во Избирачкиот список се запишуваат сите граѓани со наполнети 18 години живот заклучно со денот на изборите согласно актот за распишување на изборите кои имаат живеалиште на територијата на Република Македонија, а кои имаат важечка лична карта или патна исправа“ се отфрла формулацијата „кои имаат важечка лична карта или патна исправа“.
Измените на Изборниот законик беа предложени од пратениците Арбр Адеми (ДУИ), Мартин Костовски (СДСМ), Никола Мицевски (ВМРО-ДПМНЕ) и Атнан Незири (Алијанса за Албанците).
„…Со овие измени се допрецизираат одредбите во однос на регистрацијата на гласачите со цел сите гласачи кои ги исполнуваат условите да бидат запишани во избирачките списоци, со отстранување на ограничувањата врз основа на истечени документи за идентификација… Со преодната одредба од овој предлог се уредува правото избирачите да може да гласаат со лична карта или патна исправа чијашто важност истекла во периодот од 9 (девет) месеци до денот на одржување на изборите“,
стои, меѓу другото, во текстот на предлог-измените на Изборниот законик по скратена постапка.
Со усвоените предлог-измени на Изборниот законик, дополнително се овозможува граѓаните кои наполниле 18 години заклучно со денот на изборите, односно помеѓу двата изборни круга, да може да гласаат приложувајќи документ за лична идентификација (пасош или лична карта).
Со измените на ИЗ, дополнително се задолжуваат јавниот радиодифузен сервис, како и телевизии на државно ниво да ги објавуваат содржините поврзани со изборниот процес во формат достапен за лицата со попреченост, односно со користење знаковен јазик, титли, тонски опис или други алатки за обезбедување пристапност.