Градот Скопје распиша тендер во кој бара акредитирана лабараторија за мерење на квалитетот на воздухот. Предвидените средства не се големи, околу 9.000 евра, но целата набавка отвара прашање- зошто Градот би мерел квалитет на воздух, кога тоа веќе го прави Министерството за животна средина?
Од канцеларијата за односи со јавноста на градоначалникот Петре Шилегов, објаснуваат дека мерењата имаат специфична цел – малите загадувачи.
„Со оваа набавка ќе се овозможи ангажирање на акредитирана лабораторија која по налог на Инспекторатот на Град Скопје, ќе вршат мерења и анализи на емисиите на капацитетите кои работат со Б интегрирани дозволи (капацитети во надлежност на Град Скопје). Врз основа на овие мерења и анализи, доколку има отстапувања од пропишаните гранични вредности, понатаму постапува Инспекторатот на град Скопје.“
велат од Град Скопје
Во летниот период ретко кој и да зборува за загадувањето во Скопје. Но, веќе по првите студови, мерните станици во главниот град покажуваат загадување неколкупати поголемо од дозволените граници. Граѓаните најчесто реагираат на социјалните мрежи, некои и со фотографии од „сомнителни“ оџаци или депонии. Јавниот впечаток со години, сепак, е дека надлежните реагираат бавно или недоволно. Архивата на медиумите покажува дека во декември минатата година, инспекторите за животна средина на Град Скопје казниле вкупно 4 објекти со Б интегрирана дозвола кои ги пречекорувале дозволените вредностите. Казните во вакви случаи се движат од 8.000 до 20.000 евра.
Зголемената јавна свест и притисок врз институциите, сепак не се без видливи резултати. Град Скопје неодамна се пофали дека од почетокот на годинава до крајот на мај, комуналните редари изрекле вкупно 649 мандатни казни за сторени прекршоци според Законот за јавна чистота. Тоа е дури за четири пати повеќе во споредба со истиот период минатата година.