Најави дека, според динамиката на работата, проектот може да заврши и пред предвидениот рок, односно порано од крајот на оваа календарска година
Според него, пробиени се околу 88 отсто од трасата, а останатите делови, кои опфаќаат неколку објекти, се очекува да бидат расчистени во наредните десетина дена. Останатите околу 12 отсто од трасата, односно расчистувањето на три до четири објекти, треба да биде завршено во наредните денови. Со тоа целосно ќе се овозможи пристап и ќе започне реализацијата на булеварот, кој на оваа делница предвидува нова атмосферска канализација, пешачко-велосипедски патеки и безбеден коловоз оти ова место во минатото важеше за една од црните точки во овој дел од Скопје
Продолжува доизградбата на булеварот „Борис Трајковски“, еден од клучните инфраструктурни проекти за подобрување на сообраќајната поврзаност кон населбата Драчево и околните места во Општина Кисела Вода, соопшти денеска градоначалникот на Град Скопје, Орце Ѓорѓиевски, кој денеска изврши увид во градежните работи на трасата што деновиве се довршува.
По три децении, како што рече тој, се решени имотноправните односи на оваа делница, со што решавањето на булеварот конечно станува реалност за граѓаните од Драчево, Зелениково и Студеничани.
„Стојам на булеварот кој со децении беше закочен, заборавен и претворен во вистинска голгота за илјадници граѓани. Булевар по кој секое поминување значеше нервоза, гужви, прашина, небезбедност, оштетени возила и изгубено време. Конечно се отвора патот за реализација на овој долгоочекуван проект, кој премногу пати беше ветуван, а никогаш не беше завршен“,
вели градоначалникот.
Најави дека, според динамиката на работа, проектот може да заврши и пред предвидениот рок, односно порано од крајот на оваа календарска година.
„Станува збор за околу еден километар траса, каде што со години немаше услови за нормален и безбеден сообраќај. Триесет години немаше барање начин од страна на градските власти за да се овозможи слободен пристап, функционална безбедна траса за граѓаните од Драчево, Зелениково, Студеничани, односно за околу 100 000 граѓани кои секојдневно гравитираат кон овој дел од градот“,
рече тој.
Според него, пробиени се околу 88 отсто од трасата, а останатите делови, кои опфаќаат неколку објекти, се очекува да бидат расчистени во наредните десетина дена.
„Преостануваат уште околу 12 отсто од трасата, односно расчистување на три до четири објекти, што треба да биде завршено во наредните денови. Со тоа целосно ќе се овозможи пристап и ќе започне реализацијата на булеварот, кој на оваа делница предвидува нова атмосферска канализација, пешачко-велосипедски патеки и безбеден коловоз оти ова место во минатото важеше за една од црните точки во овој дел од Скопје“,
кажа скопскиот градоначалник.
Вкупната инвестиција на овој потег, додаде, изнесува околу два милиони евра.
Паралелно со овој проект, како што информира градоначалникот, се работи и на клучката „Момин Поток“, како и на мостот на улицата „Љубљанска“.
Во однос на состојбата со хигиената во главниот град, Ѓорѓиевски рече дека Градот Скопје работи со стара механизација, но најави дека наскоро ќе пристигнат околу 40 нови камиони, како и 2 600 нови контејнери.
При преземањето на функцијата, како што додаде, на располагање имало само 16 камиони, додека сега се функционални околу 60 возила.
Голем проблем, според него, претставува и недостигот на контејнери на повеќе локации низ градот, посочувајќи дека на одредени места каде што се потребни шест контејнери, има поставено само еден.
Одговарајќи на новинарски прашања за поставувањето на водителот Миро Кацаров за в.д. директор на Универзалната сала, Ѓорѓиевски рече дека наредните денови ќе биде распишана нова постапка за избор на директор на установата.
„Во моментов за в.д. директор е назначен Миро Кацаров, кој е од редот на вработените во институцијата. Претходно е спроведен јавен повик за избор на директор на Универзалната сала, но постапката не успеа, поради што беше неопходно да се назначи вршител на должност“,
кажа Ѓорѓиевски.