Ѓоковиќ потврди дека добил виза за влез во Австралија, па така на најдобриот српски тенисер автоматски му се отстранува тригодишната забрана за влез во Австралија, по што ќе може да игра на Австралија опен на почетокот на следната година
Владата на Австралија денеска потврди дека српскиот тенисер Новак Ѓоковиќ добил виза да се натпреварува на Австралија опен во јануари 2023 година.
Како што јавува РТС, австралиското Министерство за имиграција издало соопштение за одлуката на министерот Ендрју Гилс да ја смени одлуката на неговиот претходник Алекс Хок кој во јануари годинава ги искористи своите овластувања и врз основа на „јавен интерес“ му ја укина визата на Ѓоковиќ бидејќи тој не беше вакциниран против ковид-19.
Така, на најдобриот српски тенисер автоматски му се отстранува тригодишната забрана за влез во Австралија, по што ќе може да игра на Австралија опен на почетокот на следната година.
Ѓоковиќ на 16 јануари годинава беше депортиран од Австралија каде требаше да настапи на овој турнир.
Ѓоковиќ потврди дека добил виза за влез во Австралија и ќе може да настапи на првиот Грен слем турнир идната година, Австралија опен во јануари 2023.
„Бев многу среќен кога ја примив веста. Тоа е олеснување по сето она што јас и моите блиски луѓе го поминавме оваа година во Австралија и потоа“,
рече Ѓоковиќ и додаде дека Австралија опен е неговиот најуспешен Грен слем.
Ѓоковиќ рекордни девет пати го освои турнирот Австралија опен.