Локвенец изјави денеска дека привршува тендерската постапка за избор на изведувач и дека се обезбедени вкупно 165 милиони евра
Почеток на изградбата на пругата Скопје-Софија, во текот на оваа година, најави денеска генералниот директор на ЈП за железничка инфраструктура „Железници на Северна Македонија“, Хари Локвенец, на средба во Скопје со бугарскиот колега Красимир Папукчиски, генерален директор на Националната компанија за железна и патна инфраструктура на Бугарија.
Тој рече дека привршува тендерската постапка за избор на изведувач и дека се обезбедени вкупно 165 милиони евра.
„Тендерот е распишан и со изборот на изведувач почнува тридецениската желба да се реализира. Очекувам за 3-4 месеци овде веќе да се гради. За важноста на овој проект за нашата земја, за граѓаните, за стопанството, за бизнисот е зборувано многупати. Тој е дел од Коридорот 8 и железничкото поврзување на нашите две земји е взаемен влог во европската агенда за поврзување на целиот регион. Затоа денеска со мене е мојот колега од Бугарија. Затоа овој проект го придвижуваме заедно со нашите партнери од Бугарија“,
изјави Локвенец.
Тој и Папукчиски остварија средба во просториите на ЈП „Железници на Северна Македонија“, на која присуствуваа и претставници на делегацијата на Европската Унија во Скопје, кои, како што се соопштува, дадоа силна поддршка за реализација на проектот и продлабочување на инфраструктурната соработка. Потоа, заедно го посетија градилиштето, делот од Коридорот 8, Режановце, првата делница од Куманово до границата со Бугарија.
„Овде, сите сме свесни за нашата одговорност во однос на реализацијата на паневропскиот транспортен Коридор 8, кој ќе го поврзе Јадранското со Црното Море, преку Албанија, Северна Македонија и Бугарија. Моментно се спроведува проект за техничка помош за подготовка на проектот за модернизација на железничката линија Софија – Перник – Радомир – Ѓуешево – граница со Република Северна Македонија, која е дел од главната мрежа и делумно поминува вдолж Коридорот Ориент-Источен Медитеран. Инвестицискиот проект предвидува изградба на железничка магистрална пруга за опслужување на населението, домашниот и меѓународниот товарен сообраќај. Овој проект ќе обезбеди оперативна компатибилност на инфраструктурата, опремата, системите за управување, експлоатација и безбедност, како и поврзување со европските железнички мрежи преку примена на унифицирани стандарди и во согласност со барањата на Трансевропската транспортна мрежа. Во моментов, железничката линија Софија – Перник – Радомир – Ѓуешево има вкупна должина од 139 километри. Брзината во делот варира од 70 до 100 километри на час, со одредени ограничувања од 40 до 75 километри на час. По спроведувањето на проектот очекуваме брзината да достигне 130/160 километри на час. Да си посакаме плодна работа и да се потсетиме дека при изградбата на железничките пруги нашите предци знаеја дека градат историја“,
рече Папукчиски.