Бујар Османи изјави дека, и по овие избори, победничката партија кај Албанците треба да биде дел од новата влада, но не спомна дали на чело на владата мора да биде и партијата на Македонците која ќе освои најмногу мандати или се можни и искуства како во 2017 година
Можното сојузништво на СДСМ со Беса и со ДПА може да влијае и на промена на „формулите“ за формирање на идната влада, со оглед на тоа што тоа би била прва „мешана коалиција“ на парламентарни избори
Партијата од албанскиот политички блок, која ќе биде победник на претстојните парламентарни избори, потоа треба да ги претставува Албанците во земјава и во идната влада. Со ваков став настапи денеска вицепремиерот Бујар Османи од ДУИ, не спомнувајќи воопшто дали следната влада би требало да ја предводи и партијата од македонскиот блок која ќе освои најмногу мандати на изборите.
Во очекување денеска да се официјализира коалицијата меѓу Алтернатива (која е дел од владејачката коалиција) и моментно опозициската Алијанса за Албанците, Османи зборуваше единствено за тоа како треба да се позиционираат партиите на Албанците во земјава по изборите, односно кога ќе почнат преговорите за формирање на владата. Тој посебно го нагласи искуството на ДУИ од 2006 година, кога Никола Груевски, во својата прва влада, ја покани за партнер ДПА, која тогаш освои шест мандати помалку од интегративците на Али Ахмети.
Искуството од 2006 година
„Една грешка е направена во периодот 2006-2008 година, кога партија што не ја претставуваше волјата на Албанците од изборите влезе во владата. Тоа предизвика политичка криза, блокади на Собранието, брзи предвремени избори“,
рече Османи.
Тој нагласи дека системот не препознава поинакво претставување освен од тој што ја претставува волјата на Албанците . За Алијансата за Албанците и за Алтернатива рече дека, ако нивната коалиција победи на изборите, тогаш тие треба да бидат во владата. Сепак, Османи очекува убедлива победа на ДУИ и на овие избори.
„Ако победат овие партии секако дека тие треба да бидат во владата. Тој што ќе победи кај Албанците, тој ќе ги претставува Албанците во владата. Ова прашање, за жал, ние го сфативме на најлошиот можен начин, преку лично искуство. Примерот од 2006-2008 година ни покажа дека државата не може да дозволи такви работи уште еднаш. Меѓутоа, ние сме пред избори. Убедени сме дека ДУИ ќе извојува најголема победа од сите досега. Може да кажам дека битката ќе биде тешка, ама ние сме подготвени“,
изјави Османи.
Во парламентарниот состав што се распушти неодамна, ДУИ имаше најголем број пратеници (10) во т.н. албански политички камп. Од друга страна, резултатот што интегративците го постигнаа на последните парламентарни избори, практично, е еднаков со збирот на мандатите на другите партии од албанскиот блок, со оглед на тоа што ДПА освои два мандата, Алијансата за Албанците три, а Беса имаше петмина пратеници, од кои тројца подоцна станаа дел од Алтернатива на Африм Гаши. Освен тоа, во парламентарниот состав кој е во заминување има уште неколкумина Албанци што влегоа во законодавниот дом од листите на СДСМ.
И за претстојните избори, СДСМ планира да номинира етнички Албанци од своите редови на кандидатските листи за пратеници. Покрај тоа, СДСМ е и во разговори за коалицирање со останатите две парламентарни партии од албанскиот блок – Алтернатива и ДПА. Доколку биде постигнат договор за заеднички настап, тоа ќе биде прва „мешана“ коалиција во земјава на парламентарни избори. Сепак, мразот на овој план беше скршен во 2017 година, кога СДСМ и ДУИ коалицираа во повеќе општини за време на тогашните локални избори. Потоа, на ланските избори, коалициските партнери во Владата застанаа заеднички зад кандидатурата на Стево Пендаровски за шеф на државата.
Искуството од 2017 година
Претходно, на почетокот на 2017 година, ДУИ, и покрај осумгодишното коалицирање со ВМРО-ДПМНЕ во Владата, влезе во преговори со СДСМ за формирање на новиот кабинет на „Илинденска“. Коалицијата беше договорена, иако на изборите во декември 2016 година СДСМ освои две пратенички места помалку од дотогаш владејачката ВМРО-ДПМНЕ, односно соодносот беше 49 спрема 51. Тогаш дел од владејачката коалиција стана и Алијансата за Албанците, која премина во опозиција по локалните избори во 2017 година, за што како главна причина се посочуваа несогласувања со ДУИ. Подоцна, во владата влегоа ДПА и Алтернатива, додека крилото на Билал Касами во Беса цело време остана во опозиција.
Во пресрет на десеттите парламентарни избори, сепак, значително се менуваат релациите меѓу партиите од двата политички кампуси. Алијансата за Албанците и Алтернатива влегуваат во коалиција, СДСМ е пред можна коалиција со Беса и ДПА, додека ДУИ се определи за самостоен изборен настап.
Запрашан денеска за можното сојузништво на СДСМ со Беса и со ДПА, лидерот на ДУИ, Али Ахмети, кусо изјави: „Не гледам ништо во тој сојуз, затоа што не знам ништо.“
Првичните проценки во СДСМ се дека планираната „мешана коалиција“ со партии од албанскиот блок, веројатно, ќе влијае и за промена на „формулите“ за формирање на новата владејачка коалиција. Сепак, тоа ќе се знае по завршувањето на изборите и објавувањето на резултатите, по што партијата која ќе го добие мандатот за формирање влада би можела околу 10 мај да ги почне преговорите со потенцијалните партнери.