Го кочеа проектот како опозиција, а сега се китат со туѓо перје, велат од СДСМ за патот Страцин – Крива Паланка

„Проектот за експресниот пат Страцин – Крива Паланка беше почнат во 2018 година и над 90 отсто беше завршен до првата половина на 2024 година, во време на СДСМ. Да не беа блокадите на пратениците на ВМРО-ДПМНЕ, овој пат можеше многу порано да се заврши уште во 2024 година“, велат од опозицијата

ВМРО-ДПМНЕ се кити со туѓо перје, над 90 отсто од патот Страцин – Крива Паланка беше завршен за време на нашето владеење, велат денеска од опозицискиот Социјалдемократски сојуз (СДСМ).

Оттаму посочуваат дека денеска власта покажала и големо лицемерие.

„Проектот за експресниот пат Страцин – Крива Паланка беше почнат во 2018 година и над 90 отсто беше завршен до првата половина на 2024 година, во време на СДСМ. Да не беа блокадите на пратениците на ВМРО-ДПМНЕ, овој пат можеше многу порано да се заврши уште во 2024 година“,

велат од опозицијата.

Како што велат оттаму, тогашниот претседател на Комисијата за финасирање и буџет, Бојан Стојаноски од ВМРО-ДПМНЕ, со месеци го кочеше предлогот на законот за грантот вреден 14 милиони евра, кој беше потребен за завршување на експресниот пат.

„Мицкоски, Николовски и Трајановски го покажаа лицемерието на ДПМНЕ, го кочеа овој проект како опозиција, а денеска се китат со туѓи перја“,

се вели во соопштението од СДСМ.

Токму благодарение од СДСМ, велат од партијата, Крива Паланка и североисточниот регион го доби најголемиот капитален проект од независноста до денеска, вреден 94 милиони евра.

Во јули немаше ниту еден сантиметар асфалт, а денеска гледаме цела делница, порача Мицкоски на пуштањето на патот Страцин – Крива Паланка

Денеска во употреба е пуштен експресниот пат од Срацин до Крива Паланка, што значи дека на таа делница ќе се патува 10 минути, а од Крива Паланка до Куманово наместо еден час ќе се стигнува за 40 минути.

Патот е во должина од 25,5 километри и е дел од Коридорот 8. Вкупната инвестиција е 93,7 милиони евра од кои 80,20 милиони евра се средства од Светска банка, а останатите се грант-средства во висина од 13,50 милиони евра.

На свеченоста присуствуваше и премиерот Христијан Мицкоски, кој порача дека со иста динамика ќе се работи и на другите делници, а се интензивира и изградбата на другите патишта низ земјава.

На опозицијата ѝ порача капиталните проекти да не ги користат за собирање политички поени.