Постојаниот комитет за вакцинација на Германија (STIKO) денеска донесе нова препорака според која лицата под 60 години кои веќе ја примиле првата доза од вакцината на АстраЗенека, не треба да примат ревакцина од истиот производител.
Во обновената препорака објавена на нивната официјална веб-страница, тие укажуваат дека остануваат на ставот дека се додека не се направат дополнителни испитувања, поради претпазливост, вакцината на АстраЗенека и натаму нема да се администрира на лица помлади од 60 години.
Новината е во тоа што за оние кои веќе ја примиле првата доза, им се препорачува, во определениот рок од 6 недели, наместо со АстраЗенека, имунизацијата против ковид-19 да ја завршат со доза од мРНА вакцина.
Како адекватна замена, според сугестијата на СТИКО, ревакцината би требало да се изврши со вакцините на Фајзер или на Модерна.