Пендаровски и германскиот претседател попладнево разговарале телефонски за актуелната ситуација на релација Софија-Скопје
Претседателот на државата Стево Пендаровски денеска телефонски разговорал со претседателот на Германија, Франк-Валтер Штајнмајер, а тема, како што соопштија од неговиот кабинет била актуелната ситуација на релација Софија- Скопје.
„Пендаровски изрази задоволство од интензивниот политички дијалог меѓу двете држави и упатил благодарност до германскиот претседател за постојаната германска поддршка за нашата европска интеграција и затоа што прашањето за проширување на ЕУ е во приоритетите на германското претседавање. Во таа насока, претседателот Пендаровски посочи дека очекува до крајот на годинава да се одржи првата меѓувладина конференција со што ќе се означи официјалниот почеток на преговорите на Република Северна Македонија со ЕУ“,
се вели во соопштението.
Германскиот претседател Штајнмајер, каако што се објавуваат од Кабинетот на Пендаровски, истакнал дека после конструктивните разговори меѓу претставниците на владите на Северна Македонија и Бугарија во Берлин во текот на вчерашниот ден, се надева дека во рамки на германското претседателство, до крајот на годинава, официјално ќе започнат преговорите на ЕУ со нашата држава.
При тоа, Штајнмаер истакнал дека билатералните прашања треба да се решаваат во духот на добрососедството и на европските вредности, се наведува во соопштението.
„Двајцата претседатели констатираа дека прашањата во однос на историјата треба да продолжат да се дискутираат меѓу експертите во рамки на заедничката комисија за историски и образовни прашања. Било истакнато и позитивното искуство на Германија во оваа сфера и понудена поддршка на работата на комисијата“,
соопштуваат од Кабинетот на Пендаровски.
