Предлог-законот што го усвои Владата мора да биде одобрен и од Парламентот, а Министерството за здравство очекува законот да стапи во сила до крајот на годинава
Германската Влада денеска одобри план за либерализација на правилата за канабис, што е прв чекор кон декриминализирање на поседувањето на ограничени количини канабис и овозможува на членовите на „канабис клубот“ да го купуваат за рекреативни цели.
Предлог-законот што го усвои Владата мора да биде одобрен и од Парламентот, а Министерството за здравство очекува законот да стапи во сила до крајот на годинава.
Според предлогот, што неодамна го објави министерот за здравство Карл Лаутербах, ќе се легализира поседувањето до 25 грама канабис за рекреативни цели, а поединците ќе можат сами да одгледуваат до три растенија.
На Германците над 18 години ќе им биде дозволено да се приклучуваат на непрофитни „клубови за канабис“, од кои секој ќе може да има најмногу 500 членови, а повеќекратните членства во клубови ќе бидат забранети. Тие клубови ќе можат да одгледуваат канабис за личните потреби на своите членови.
Според новите регулативи, поединците ќе можат да купат до 25 грама канабис дневно или до 50 грама месечно, или 30 грама за оние помлади од 21 година.
Трошоците на клубовите ќе бидат покриени со членарина, која ќе се одредува според тоа колку канабис користат членовите.
Германските власти се надеваат дека планот ќе помогне во сузбивање на црниот пазар, заштита на потрошувачите од контаминирани производи и намалување на криминалот поврзан со дрога.
„Сепак, употребата на канабисот има свои ризици. Никој не би требало погрешно да го чита овој закон. Консумирањето марихуана ќе биде легализирано, но останува опасно“,
стои во заедничкото соопштение на министерствата за здравство и земјоделство, пренесува Дојче Веле.
Лаутербах вели дека целта е да се ограничи црниот пазар и криминалот поврзан со дрога, трговијата со фалсификувани или токсични материи и бројот на потрошувачи.
„Заштитата на децата и тинејџерите е централен елемент на целиот законодавен проект. Ние не го создаваме проблемот. Се обидуваме да го решиме проблемот“,
вели Лаутербах.
Но, со ова не се согласува централнодесничарската опозиција која тврди дека власта продолжува со легализацијата на ризичниот наркотик и покрај европските правни пречки и мислењето на експертите.
Организацијата на германските судии оцени дека планот најверојатно ќе го зголеми наместо да го намали товарот на правосудниот систем, па дури и може да ја зголеми побарувачката за канабис на црниот пазар.
По стапувањето во сила на новиот закон, вториот чекор е петгодишно тестирање на регулирани комерцијални синџири на снабдување во одредени региони и потоа научна проценка.
Владата на Германија, по разговорите со институциите на ЕУ, се откажа од претходно планираната продажба на канабис низ целата земја во лиценцирани продавници.
Лаутербах рече дека Германија не сака да го копира моделот на соседна Холандија, кој комбинира декриминализација со мала пазарна регулатива, велејќи дека Германија сака да даде пример за Европа.
Според владините проценки, 4,5 милиони возрасни во Германија користат марихуана барем еднаш годишно.