Германија експресно го поздрави мини-извештајот на Европската комисија и порача дека очекува наскоро да започнат и преговорите, пишува Дојче Веле.
Хајко Мас, шеф на германската дипломатија рече дека одново се добиени добри оценки и за Северна Македонија и Албанија.
„Постои јасен напредок, пред сè во реформата на судскиот систем и борбата против организираниот криминал и корупција“,
соопшти Мас.
Германија ја споделува „позитивната оценка на Европската комисија“ и се залага за „брз почеток на преговорите за членство“.
Претходно, еврокомесарот за соседство и проширување Оливер Вархеји рече дека по усвојувањето на ревидираната методологија за процесот на пристапување и по денешната презентација на ажурираните извештаи за напредокот на Албанија и на Северна Македонија, на двете земји треба да им се отвори европската перспектива.
„Земјите ги засилија своите активности и испорачаа опипливи резултати во клучните области утврдени во Заклучоците на Советот од јуни 2018 година. Комисијата останува цврсто на својата препорака за отворање на пристапните преговори со Албанија и со Северна Македонија и се надевам дека земјите членки ќе донесат позитивна одлука во наредните недели“,
изјави Вархеји.
Во мини-извештајот што денеска беше усвоен, Европската комисија ја повторува валидноста на препораката за Северна Македонија да почне преговори за членство во ЕУ. Документот се објавува во пресрет на состаноците на Советот на ЕУ кон крајот на месецот, на кои, според најавите, би можело да се донесе одлука за старт на пристапни преговори со Скопје и со Тирана. Таква надеж денеска во Брисел изрази и портпаролката на ЕК, Ана Писонеро, користејќи формулација дека верува оти тоа ќе се случи „многу пред Самитот ЕУ-Западен Балкан во Загреб“ предвиден за почетокот на мај.