На почетокот на овој месец Грција беше избрана за членка на Советот за безбедност на Обединетите нации за периодот помеѓу 2025 и 2026 година, а Герапетритис верува дека историските врски со арапскиот свет ѝ даваат на неговата земја кредибилитет да дејствува како посредник за мир
Европа има должност да прима деца кои се повредени и трауматизирани од војната во Газа сè додека трае конфликтот, изјави грчкиот министер за надворешни работи Јоргос Герапетритис за Ројтерс.
Герапетритис бара партнери за проект за привремено доведување на децата во Европската Унија и рече дека оваа недела разговарал за идејата со палестинскиот премиер Мохамад Мустафа.
„Треба многу јасно да се соочиме со оваа трагедија. Европа треба да биде отворена за повредените луѓе од Газа, но и за децата на кои сега им се заканува глад и други видови опасности“,
рече Герапетритис.
На почетокот на овој месец Грција беше избрана за членка на Советот за безбедност на Обединетите нации за периодот помеѓу 2025 и 2026 година, а Герапетритис верува дека историските врски со арапскиот свет ѝ даваат на неговата земја кредибилитет да дејствува како посредник за мир.
Грчкиот шеф на дипломатијата не кажа колку луѓе ќе бидат примени во Грција или во Унијата, но рече дека за ова прашање се разговара со палестинските власти.
Ова е очигледен повик за хуманитарна помош
Тој нагласи дека иницијативата не е поврзана со редовните миграции, кои станаа политички чувствителни во Европа и на кои особено се противи се посилната десница.
„Ова е очигледен повик за хуманитарна помош. Овде не зборуваме за економски мигранти или други видови нерегуларна миграција“,
рече Герапетритис.
Грција го осуди нападот на 7 октомври врз Израел од страна на милитантите на Хамас, но го повика Израел да ја запре копнената и воздушната офанзива врз Газа, каде што палестинските власти тврдат дека повеќе од 35 000 луѓе се убиени и дека се уништени цели градови.
Психолошкиот ефект на војната врз децата е огромен
Светската здравствена организација тврди дека многумина во Газа се изложени на ризик од глад и дека повеќе од 8 000 деца под пет години страдаат од акутна неухранетост.
„Исто така, психолошкиот ефект на војната врз децата е огромен“,
вели Герапетритис.
Герапетритис рече дека разговарал со палестинскиот и израелскиот премиер оваа недела за можните начини за постигнување мир и обнова на Газа.
„Не треба да чекаме војната да престане за да почнеме да разговараме за тоа. Тоа ќе биде огромен проект и треба да го развиеме што е можно поскоро“,
рече тој.