„За кратко време размислуваме да закажеме јавна седница на која детално ќе биде разгледан извештајот“, рече претседателот на Советот, Сашко Георгиев
Извештајот од оценската мисија на Европската Унија (ЕУ), кој содржи 40 препораки за работата на Судскиот совет, најверојатно ќе биде разгледуван на јавна седница на Советот. Ова денеска го најави претседателот на Судскиот совет Сашко Георгиев, кој информира дека извештајот на ЕУ го добиле во текот на вчерашниот ден.
„За кратко време размислуваме да закажеме јавна седница на која детално ќе биде разгледан извештајот“,
изјави Георгиев.
Прашан дали Судскиот совет планира подобрување и реформирање на ова тело согласно препораките од ЕУ, Георгиев посочи дека токму на јавната седница ќе се дискутираат овие прашања.
Одговарајќи на новинарско прашање каде ја гледа одговорноста за лошите оценки на Судскиот совет, тој вели дека и во самиот извештај се нотира дека станува збор за проблеми кои се наталожени со години наназад, а со кои, како што вели, Советот сега се обидува да најде начин да ги решава.
„Извештајот е даден со препораки за краток, среден и подолг временски период, каде што некои детектирани состојби би требало да се регулираат со законски измени. Има еден дел од тоа што начелно видовме и од тоа што слушаме од медиумите, би требало согласно законот да се имплементираат и да се постапува“,
вели Георгиев.
Извештајот на оценската мисија на ЕУ за работата на Судскиот совет содржи 40 препораки од кои 17 се во доменот на самиот Совет, а за останатите 23 се потребни интервенции во Уставот и во законите кои ја регулираат конкретната материја. Препораките, без премногу да навлегува во детали, вчера на брифинг со новинарите ги презентираше евроамбасадорот Дејвид Гир. Извештајот е споделен со властите и надлежните институции, но нема да биде јавно објавен бидејќи, како што кажа евроамбасадорот, со тоа се намалува неговата ефективност.
Во неодамнешното интервју за „360 степени“ претседателот на Судскиот совет изјави дека доколку оценската мисија на ЕУ заклучи дека Советот треба целосно да биде распуштен, одлуката ќе биде испочитувана.