„Сето ова ми дава за право да разберам дека оваа ситуација не е резултат на намерен обид за оцрнување или елементарно непознавање на нештата за толку прости работи, колку што е резултат на невиден отпор да се прифати еден поинаков профил на претседател на Собрание, кој по 22 години промовира различни вредности од тоа што било претходно. За нивна жал, нивниот век заврши на 8 мај“, вели Гаши во интервју за „Фокус“
По бројните критики и обвинувањата дека користи службено возило и службено обезбедување на приватно патување на свадба во Косово, спикерот Африм Гаши во интервју за неделникот „Фокус“ вели дека таквите критики биле отпор да се прифати еден поинаков профил на претседател на Собрание кој по 22 години промовира различни вредности од тоа што било претходно.
„Се појавија неосновани тврдења дека злоупотребувам службени возила, и покрај тоа што сум обврзан со закон да бидам постојано обезбедуван и за време на службените должности и при приватно патување. Кога овие тврдења се гледаат изолирано, тие навидум може да изгледаат како тенденции за прикажување инциденти. Сепак, верувам дека тие се симптоми за едно подлабоко прашање кое е присутно со години. Сето ова ми дава за право да разберам дека оваа ситуација не е резултат на намерен обид за оцрнување или елементарно непознавање на нештата за толку прости работи, колку што е резултат на невиден отпор да се прифати еден поинаков профил на претседател на Собрание, кој по 22 години промовира различни вредности од тоа што било претходно. За нивна жал, нивниот век заврши на 8 мај“,
вели Гаши нагасувајќи дека неговата политичка мисија отсекогаш била да покаже дека земјата може да ја водат професионални, компетентни, квалификувани и доброобразовани поединци.
Тој во интервјуто посочува дека за време на трите месеци, колку што е на спикерската функција, направил значајни чекори за воспоставување и функционализација на парламентарна инфраструктура на парламентот.
„Мојот избор за претседател на Собранието беше поддржан од сите коалициски партнери, а мојот професионален интегритет е нешто со што се гордеам, без разлика дали го ценат сите. Проблемот што некои кругови го имаат не е со моите квалификации, туку со фактот дека јас претставувам нов профил на носител на функција во оваа земја. Како претседател на Собранието, врз себе носам минато како правник, уредник, долгогодишен граѓански активист и десетгодишно политичко искуство. Мојот избор беше заснован на заслуги, а не на сомнителни зделки или врски. За разлика од некои други слични политички експоненти, јас немам членови на семејството на високи државни позиции, кај мене не може да најдете ниту еден случај на злоупотреба на позицијата за лични или семејни придобивки“,
посочува спикерот Гаши.
На 3 септември во Собранието е закажана пленарна седница на која е ставена на дневен ред Интерпелацијата за претседателот на Собранието, Африм Гаши, поднесена од пратениците на Левица.
Интерпелацијата е заснована на седум точки, образложени на десет страници. Во барањето за интерпелација се наведува дека спикерот Гаши уште од почетокот на неговото назначување работи своеволно, нестручно, несовесно и непрофесионално и згора на сѐ противзаконски неуставно и неделовнички.
Итна смена на Гаши по инцидентот на скопскиот аеродром со косовската претседателка во кој учествуваше неговиот шеф на обезбедување кој доби кривична пријава и отстранување од работното место, побараа и од СДСМ.
СДСМ бара итна смена на собранискиот спикер Африм Гаши, Левица му поднесе интерпелација
Владејачката ВМРО-ДПМНЕ, пак, смета дека не е потребна смена на собранискиот спикер, а обвинувањата од опозицијата ги оценуваат како обиди „да се ќарат политички поени“. Интерпелацијата за Гаши, според „Вреди“ е обид да се предизвика политички земјотрес и да се стави на тест владиното мнозинство.