Лидерот на Алтернатива, Африм Гаши, во вечерашното гостување во емисијата „360 степени“ на ТВ Алсат, потврди дека на неговата партија ѝ било кажано оти Левица нема да биде дел од новото мнозинство, како што претходно изјавуваше и пратеникот од оваа партија, Скендер Реџепи-Зејд.
„Вистина е тоа, кога ни беше кажано дека ги имаме бројките, нам ни беше кажано дека нема да биде партијата на г. Апасиев дел од ова мнозинство. И ние, по оваа констатација, верувајќи дека ова е ситуацијата, влеговме во овој процес. Но, се докажа дека не е така. За нас беше многу поважно да се докажеме дека сме за рушење на власта каде е ДУИ, но тоа не се случи. Независно на резултатот, за мене како претседател на Алтернатива, заради гласачите, моите активисти, за мене беше многу важно јас да сум верен кон нив, кон Албанците, кон гласачите што не гласаа, за да бидеме на линијата која сме ја зборувале седум години. Затоа, во демократија, во Собрание каде има двајца пратеници избрани на демократски начин, вие немате право да негирате нечие право да биде во еден потпис со вас, да гласа како што гласате вие итн.“,
рече Гаши.
Во однос на тоа што само Димитар Апасиев го повлече потписот од иницијативата за гласање недоверба на Владата, но не и вториот пратеник од Левица, Борис Крмов, Гаши рече дека неговите информации се оти и тој изразил подготвеност да го повлече потписот, но дента бил далеку од Скопје.
Тој кажа дека соборувањето на Владата била само првата фаза, но ако дошло до втората и се преминало кон формирање нова Влада со друг мандат, Гаши рече дека бил убеден оти дел од другите пратеници, кои се дел од досегашното мнозинство, ќе се приклучеле на евентуалното ново и во таков случај ќе немало потреба Левица да биде дел од тоа.