Оваа резолуција, како што истакнаа и нејзините предлагачи, според него, не е насочена против никого посебно, туку се однесува единствено на извршителите на геноцидот кои, според Гаши, секако се општо познати, а за некои веќе се извршени и меѓународни пресуди за воени злосторства
Ние треба да испратиме порака и до нашите деца, до идните генерации, дека треба да ги почитуваат различностите и да се спротивстават на омразата, на предрасудите и на стереотипите. Затоа геноцид како во Сребреница не смее да се заборави, но и не смее да се дозволи да се повтори. Ова денеска од парламентот го порача претседателот на Собранието Африм Гаши на одбележувањето на Денот на сеќавањето на геноцидот во Сребреница посочувајќи дека тој, како што го нарече, грозоморен настан уште од пред 29 години е сè уште свеж во колективната меморија, особено меѓу граѓаните на овие простори.
„Особено на основното човеково право на живот, што злосторнички беше прекршено летото 1995 година, кога за само неколку дена згаснаа илјадници животи и илјадници семејства беа завиени во црно. Од името на пратениците во Собранието и од мое лично име изразувам искрено сочувство за жртвите на геноцидот во Сребреница до членовите на нивните семејства, до граѓаните и институциите на Босна и Херцеговина и до нашите сограѓани Бошњаци“,
рече Гаши.
Во јули 1995 година, за само неколку дена, како што рече биле убиени над осум илјади Бошњаци, од полугодишна до 90-годишна возраст, во едно од најголемите злосторства на територијата на Европа по Втората светска војна, истакна претседателот на Собранието.
Затоа, како што рече Гаши, не треба да бегаме од тоа овој трагичен чин на масовно крвопролевање да го наречеме со вистинското име – геноцид.
„А геноцидот не е настан што се случува спонтано и што настанува сам по себе. Тој има автор, тоа е планирана и организирана акција, со намера на истребување и уништување на другиот, во овој случај на Бошњаците од Босна и Херцеговина. Тоа беше причина и Северна Македонија, заедно со повеќето земји во светската организација, неодамна застана зад Резолуцијата на Генералното собрание на Обединетите нации со која се осудува негирањето на геноцидот и величање на воените злосторници и со која 11 јули се прогласува за Меѓународен ден на сеќавање на геноцидот во Сребреница“,
вели тој.
Оваа Резолуција, како што истакнаа и нејзините предлагачи, според него, не е насочена против никого посебно, туку се однесува единствено на извршителите на геноцидот, кои, според Гаши, секако се општо познати, а за некои веќе се извршени и меѓународни пресуди за воени злосторства.
Собранието секоја година го одбележува Денот на сеќавање на геноцидот од 1995 година откако во 2010 година со Декларација е поддржана Резолуцијата на Европскиот парламент за Сребреница.
Република Северна Македонија е меѓу 17. држави кои ја коспонзорираа Резолуцијата на Обединетите нации за прогласување на 11 јули за Меѓународен ден за сеќавање на геноцидот во Сребреница од 1995 година.