Г.г. Стефан повикува на обединување за, како што вели, да се избориме со сите неприлики со коишто катадневно се соочуваме. Сето ова, вели тој, ќе го постигнеме само ако си ги зацврстиме единството, слогата и сплотеноста, односно само ако трајно ги надминеме внатрешните разногласија и меѓусебните поделби и несогласувања
Архиепископот охридски и македонски г.г. Стефан заедно со светиот архијерејски синод, во честитката по повод велигденските празнувања испраќајќи порака за мир и благослов, се осврнува и на вековната традиција на македонскиот народ за кој вели „успевал и сѐ уште успева достоинствено да ги извојува сите битки и да им одолее на сите непријателски настроенија, исполнети со лукави намери и со зли цели“.
„Кој ќе се осмели да нѐ оспори како македонски народ и како македонска држава!? Со кое право некои сѐ уште се обидуваат да ни ги одрекуваат историјата и традицијата, јазикот и верата, кога сета македонска почва е напоена со просветителските дејанија на македонските црковно-просветни дејци, со истрајноста на сите наши родобранители, со крвта на недобројните наши маченици и со благоверието на мноштвото исповедници и поборници за зачувување на православието на ова свето македонско тло“,
се вели во пораката од г.г. Стефан.
Но, како што не потклекнаа нашите прадедовци, додава г.г. Стефан во пораката, така и ние – како нивни потомци и како доследни пазители на аманетот доверен од нив – да не дозволиме отстапки пред оние коишто постојано посегнуваат по нашето најсвето, пред оние коишто гледаат да го зграбат она коешто со векови макотрпно е градено и коешто е сочувано до денешни дни.
„Наша должност и обврска треба да ни биде да им се спротивставуваме на сите оние коишто на секаков начин се трудат да ни го одземат она за коешто се дадени многу жртви и коишто се желни да ни ги приграбат: и историјата, и земјата, и културата, и јазикот и сѐ што е наше – македонско“,
додава тој.
Г.г. Стефан повикува на обединување за, како што вели, да се избориме со сите неприлики со коишто катадневно се соочуваме. Сето ова, вели тој, ќе го постигнеме само ако си ги зацврстиме единството, слогата и сплотеноста, односно само ако трајно ги надминеме внатрешните разногласија и меѓусебните поделби и несогласувања.
На крајот од честитката, г.г. Стефан потсетува на одбележувањата кои ќе ги има во текот на оваа година: за Беласичката битка, од 1014-тата, на бележитите одлуки од Првото заседание на АСНОМ, одржано во манастирот „Свети Прохор Пчињски“, во 1944 година, прославата на 860-годишното постоење на манастирот „Свети великомаченик Пантелејмон“ во Нерези, Скопско, како и 100-годишнината од замонашувањето на возобновителот на Охридската архиепископија во лицето на Македонската православна црква – блаженоупокоениот архиепископ Доситеј.