„Ова е масовен напад од големи размери за да се парализира мрежата ’ТГВ’. Многу рути ќе мора да бидат откажани и ситуацијата ќе трае барем цел викенд додека се вршат поправки“, велат од државниот железнички оператор
Француската брза железничка мрежа е погодена од координирани злонамерни дејствија, вклучително и од подметнати пожари кои предизвикаа големо нарушување на некои од најпрометните железнички линии во земјата неколку часа пред церемонијата на отворање на Олимписките игри во Париз, пренесува Гардијан.
Француските медиуми, повикувајќи се на извор близок до истрагата, пренесуваат дека нападите со предизвикани пожари врз голем дел од француската брза железничка мрежа се координирани акти на „саботажа“.
Од државниот железнички оператор, СНЦФ (SNCF), велат дека пожарите биле запалени на инсталации вдолж линиите што го поврзуваат Париз со западниот, северниот и источниот дел на земјата.
Четвртиот подметнат пожар, додаваат оттаму, што бил на линијата што води јужно до Лион и Средоземното Море, бил спречен.
„Ова е масовен напад од големи размери за да се парализира мрежата ’ТГВ’. Многу рути ќе мора да бидат откажани и ситуацијата ќе трае барем цел викенд додека се вршат поправки“,
се вели во изјава од железничкиот оператор која ја пренесува агенцијата Франс прес.
Возовите се пренасочуваат кон други линии, што доведува до доцнење до два часа, а има и некои откажувања.
Од француската државна компанија ги предупредуваат патниците во железницата кои можат да го одложат патувањето да го сторат тоа.
??View from one of the various #French Train stations after a "wave of coordinated attacks" paralyzed French #High speed railways nationwide in France hours before the start of the #Olympic games pic.twitter.com/5LiXy8iC9i
— Uncensored News (@Uncensorednewsw) July 26, 2024
Од фирмата велат дека билетите за овие патувања се заменливи и оти средствата се враќаат.
Шефот на Државниот железнички оператор, Жан-Пјер Фаранду вели дека ова е тажен ден затоа што семејствата ќе бидат најтешко погодени од, како што рече, нападите од „неодговорни лудаци“.
Францускиот министер за транспорт Патрис Вергриет ги осуди „криминалните дела“ извршени врз железничката мрежа во текот на ноќта.
„Координираните злонамерни дејства беа насочени кон неколку линии на ’ТГВ’ минатата ноќ и сериозно ќе го нарушат сообраќајот овој викенд. Силно ги осудувам овие криминални дејствија кои ќе го компромитираат заминувањето на одмор на многу Французи“,
напиша Вергриет на социјалнaта мрежа Икс.
Des actes de malveillance coordonnés ont visé cette nuit plusieurs lignes TGV et perturberont fortement le trafic jusqu’à ce week-end. Je condamne fermement ces agissements criminels qui vont compromettre les départs en vacances de nombreux Français. Un grand merci aux équipes de…
— Patrice Vergriete (@P_Vergriete) July 26, 2024
Од париската полиција инфорираат и дека повеќе полицајци се пренасочуваат кон железничките станици во Париз бидејќи таму има голем број луѓе.