Заштитните маски од денеска во Франција се задолжителни и мора да се носат во затворени простории. Казната за непочитување на мерката изнесува 135 евра.
Маските веќе се задолжителни во јавниот транспорт, но од денеска мора да се носат и во продавници.
Претседателот на државата, Емануел Макрон, во јуни прогласи прва победа над вирусот и ја прекина вонредната состојба во државата, но се појавија нови кластери.
Министерот за здравство Оливер Веран предупреди дека во Франција има меѓу 400-500 активни кластери на вирусот.
Франција беше меѓу најтешко погодените европски држави од ковид-19, со повеќе од 200 000 заразени и 30 000 смртни случаи од почетокот на пандемијата.
Инаку, заштитните маски како заштита од ширењето на вирусот се задолжителни и во Македонија од пред повеќе од два месеца, а освен во затворени простории, тие мора да се носат и на отворено, доколку нема можност за одржување дистанца од најмалку 2 метра. Казната за неносење маска е 20 евра, а МВР досега има евидентирано над 30 000 прекршоци.