Нови рестриктивни мерки се воведуваат во Франција како борба против ширењето на коронавирусот. Претседателот Емануел Макрон денеска преку видео ѝ се обрати на јавноста и им соопшти дека земјата е принудена сега да направи драстични чекори со цел намалување на бројот на новозаразени и хоспитализирани како последица на коронавирусот.
Тој најави дека се воведува полициски час од 19 до 6 часот, се затвораат сите несуштински продавници, а сите кои сакаат да се движат подалеку од 10 километри од своите домови ќе мора да добијат дозвола. Тој најави дека ќе се затворат и училиштата и градинките во следните три недели.
„Ќе ги затвориме градинките, основните и средни училишта на три недели, а училишниот календар ќе биде поместен со цел да не ги оставаме нашите деца без учење. Од 5 април, учениците ќе имаат една недела часови преку интернет. Следните две недели, од 12 април, цела Франција ќе биде ставена на пролетен распуст. Почетокот на учебната година ќе биде за сите на 26 април. Физички за градинките и основните училишта до петто одделение, а далечински од шесто до деветто и во средните училишта. На 3 мај, овие ученици ќе можат да се вратат на физички на часовите“,
најави Макрон.
Повикувајќи на одговорно однесување за време на Велигденскиот викенд, Макрон потсети дека вакцинацијата и одговорното однесување се оружјето за борбата против епидемијата. Сите жители на Франција над 18 години ќе можат да се вакцинираат до крајот на летото, додаде Макрон.