„Денеска разговаравме со црногорскиот премиер, зборувавме со хрватскиот претседател, унгарскиот премиер. Би ги издвоил состаноците со италијанската премиерка Мелони, со шпанскиот премиер Санчез, кој беше до мене на вечерата што ја организираа претседателот на САД, Бајден и неговата сопруга Џил Бајден. Од она што можам да го издвојам се средбите со бугарскиот и албанскиот премиер“, рече премиерот од НАТО-самитот
Долго време регионот и Македонија како држава беа заложници на минатото. Потребно е да се фокусираме на иднината и на она што следува со иднината. Да ја направиме Македонија повторно горда, но и да го направиме Балканот повторно горд. Да бидеме добри соседи, да соработуваме. Ова денеска од Вашингтон преку видеопорака испратена до јавноста го соопшти премиерот Христијан Мицкоски, кој ја предводи македонската делегација на НАТО-самитот. Тој посочи дека на средбите што ги имал во текот на денот испратил неколку пораки, кои се однесуваат на државата, но и на регионот, а тој како премиер рече дека ќе остане фокусиран на овие прашања во годините што следуваат.
„Втората порака што ја испратив е дека помина времето на свиткани кичми, помина времето на корумпирани политичари што доаѓаат од Македонија и политичари што се подготвени од името да ја заштитат својата корупција и криминал и да направат буквално сè. Да потпишат сè, да го прифатат секое понижување кое ќе им биде понудено на маса само за да го заштитат својот криминал. Тоа време е веќе историја и минато. Мора да зборуваме како вистински партнери, да зборуваме како соседи бидејќи партнерството и добрососедството sе двонасочна улица. Ние тоа сакаме да го негуваме и само така да го гледаме“,
рече тој.
Во видеообраќањето Мицкоски посочи дека уште еден работен ден на НАТО-самитот што се одржува по повод 75 години од формирањето на Алијансата поминал динамично и исполнет со многу состаноци и средби кои ги имал на маргините на НАТО-самитот.
„Денеска разговаравме со црногорскиот премиер, зборувавме со хрватскиот претседател, унгарскиот премиер. Би ги издвоил состаноците со италијанската премиерка Мелони, со шпанскиот премиер Санчез, кој беше до мене на вечерата што ја организираа претседателот на САД, Бајден и неговата сопруга Џил Бајден. Од она што можам да го издвојам се средбите со бугарскиот и албанскиот премиер“,
рече премиерот.
На крајот од обраќањето, премиерот порача дека граѓаните на државата треба да бидат горди зашто даваат сè од себе да го повратат изгубеното достоинство кое изминатите седум години го немале.
„Не се само овде во Вашингтон, туку насекаде во светот бидејќи не претставуваа политичари, кои за среќа на граѓаните се сега веќе минато“,
рече Мицкоски.
Мицкоски ја предводи македонската делегација на Самитот на НАТО, во чиј состав се и министрите за надворешни работи и надворешна трговија, одбрана и внатрешни работи – Тимчо Муцунски, Владо Мисајловски и Панче Тошковски. Во Вашингтон е и претседателот на Собранието, Африм Гаши, кој во пресрет на отворањето на самитот учествуваше на Парламентарниот самит на НАТО.