„Кога нема да поставиме тешко прашање, нè обвинуваат дека сме нечии пудлици. Кога ќе отвориме тешка тема, нè обвинуваат дека сме нечии платеници. Па, еднаш сме ’комуњари’, другпат сме се продале на ВМРО, третпат сме предавници зашто кај нас се зборува и на албански, а редовно сме ’поштари на Калето’. Доброто новинарство е контроверзно само по себе. А, да се изложиш и да издржиш критика е нешто без кое не може да се опстане во оваа професија. Десет години издржавме“, порача главниот и одговорен уредник на „360 степени“, Васко Попетревски
Редакцијата на „360 степени“ вчеравечер во Музејот на современата уметност во Скопје ја прослави десетгодишнината од постоењето на информативно-политичката емисија и веб-порталот.
На настанот присуствуваа новинари, граѓански активисти, универзитетски професори, бизнисмени, дел од државниот врв, актуелни и поранешни министри и други функционери, претставници од судската и обвинителската власт, амбасадори, дипломати…
За важноста на слободното и професионално новинарство и за „360 степени“ во изминатата деценија, во своето обраќање пред пристутните зборуваше главниот и одговорен уредник Васко Попетревски.
„Слободното и професионално новинарство не е само важно за демократијата. Тоа е демократија“, рече Попетревски.
Од 2014 година наваму, порача тој, учевме, растевме, се развивавме, се проширивме – и стигнавме до 11. сезона на емисијата, чие прво издание се емитуваше вчеравечер на МРТ 1.
„Eдно од златните правила за новинарите е дека мора да бидат бесчувствителни, непристрасни, објективни набљудувачи на општеството. Ние во ‘360 степени’ го предизвикуваме овој новинарски аксиом и прашуваме: може ли да постои квалитетно новинарство без да биде пристрасно кон вредностите на либералната демократија? Ние не само што не сме бесчувствителни кон нив, туку со голема страст и посветеност се обидуваме да ги браниме. Граѓаните да ги држиме информирани, а моќните да ги држиме отчетни. И планираме да продолжиме да го правиме тоа“,
рече главниот и одговорен уредник на „360 степени“.
И продолжи:
„Кога нема да поставиме тешко прашање, нè обвинувааат дека сме нечии пудлици. Кога ќе отвориме тешка тема, нè обвинуваат дека сме нечии платеници. Па, еднаш сме ’комуњари’, другпат сме се продале на ВМРО, третпат сме предавници зашто кај нас се зборува и на албански, а редовно сме ’поштари на Калето’. Доброто новинарство е контроверзно само по себе. А, да се изложиш и да издржиш критика е нешто без кое не може да се опстане во оваа професија. Десет години издржавме. И планираме да продолжиме“.
За фотографиите на настанот беше задолжен Томислав Георгиев. Дел од нив погледнете во продолжение:
Првата емисија беше емитувана на ТВ Алсат на 15 септември 2014 г. Од 2023 г. емисијата се емитува на МРТ 1. Во меѓувреме, „360 степени“ почна да издава и дневен информативен портал.