На пет месеци пред локалните избори, пратениците на ВМРО-ДПМНЕ ја почнаа агендата насловена „Пратениците со народот“
Опозицијата влезе во нова кампања, така што нејзините пратаеници излегуваат на терен, на директни средби со граѓаните, на пет месеци пред локалните избори, кога треба да се изберат нови градоначалници и советници во општините.
Од ВМРО-ДПМНЕ информираат вечерва дека опозициските пратеници, и во текот на овој ден, ја продолжиле својата агенда, предвидена за престојниот период, а насловена „Пратениците со народот“. Повеќе членови на пратеничката група на ВМРО-ДПМНЕ оствариле средби со граѓани од повеќе населени места, каде што, како што се наведува, ги слушнале маките и проблемите со кои тие се соочуваат во секојдневниот живот.
Пратениците Владо Мисајловски, Бојан Стојаноски и Дафина Стојаноска денеска оствариле средба со граѓани од Волково, а Жаклина Пешевска посетила жители од Трубарево, Ергеле, Гоце Делчев, Идризово и Дрма.
„Граѓаните се разочарани од лагите на власта. Нема реализација на проекти, нема нови градинки, времето е застанато со промената на власта. Доаѓаат промени на локалните избори“,
вели Пешевска.
Пратеникот Миле Лефков го посети населеното место Мородвис, каде што, како што се посочува во партиското соопштение, присутните жители посочиле разочарувањето од централната власт е огромно.
Пратеникот Александар Велјановски од Тетово ги посетил жителите од населените места Јегуновце, Прељубиште и Подбреѓе, додека Ане Лашкоска и Петар Ристески, заедно со претседателот на ОК ВМРО-ДПМНЕ – Прилеп Дејан Проданоски ги посетиле жителите на населените места Ерековци, Канатларци, Селце и Тополчани, кои, како што се посочува, ги споделиле нивните проблеми во секојдневното живеење, проблемите во земјоделието, како и нивното незадоволство во однос на националната распродажба.