На средбата родителите го прашаа министерот зошто истрагата се води на селективен начин, но изразија и незадоволство дека не се притворени вистинските виновници за смртта на нивните деца
Министерот за внатрешни работи Панче Тошковски денеска ги прими семејствата на загинатите во пожарот во Кочани во просториите на Министерството откако тие претходно изразија протест пред зградата на Јавното обвинителство на РСМ и пред Собранието.
На средбата родителите го прашаа зошто истрагата се води на селективен начин, но изразија и незадоволство дека не се притворени вистинските виновници за смртта на нивните деца.
Тошковски ги увери родителите дека правда за овој случај мора да има посочувајќи оти во интерес на истрагата не смее да сподели повеќе детали.
„Ве разбирам и ви го разбирам гневот. Не сакам од ова да правам политика. Не сметам дека овие деца го заслужуваат тоа. Истрагата е сè уште во тек. Досега се осомничени 70 лица“,
рече тој.
Посочи дека за случајот е осомничен и актуелен министер, актуелни директори и актуелен градоначалник.
Потоа средбата меѓу Тошковски и семејствата на настраданите продолжи без присуство на медиумите.
Дел од родителите на загинатите во пожарот денеска влегоа во зградата на Обвинителството откако вчера оттаму упатија повик да дојдат и да се запознаат со сите аспекти на истражната постапка.
Други родители и членови на семејствата го продолжија протестот пред зградата на Обвинителството. Обвинија за партиски влијанија кај дел од родителите што отишле на состанок со обвинителите.
Потоа учесниците на протестот преку плоштадот „Македонија“ се упатија пред Собранието, каде што побараа одговорност и оставки од пратениците, но и формирање на експертска влада.
Пред присутните излезе пратеникот на Левица, Борислав Крмов, по што со нив разговараа и пратениците од пратеничката група на Социјалдемократскиот сојуз (СДСМ), предводени од лидерот на партијата, Венко Филипче.
Маршот на семејствата на настраданите во пожарот во Кочани почна во 12:05 часот, како симболика за задоцнетата реакција на институциите.