Заплената од страна на службениците е направена на повеќе гранични премини
Свечени фустани, цигари, облека, четирицикли, мотоцикли и скутери се дел од минатонеделната заплена на царинските службеници од повеќе гранични премини.
На Меѓународниот аеродром „Скопје“, во торбите на македонски државјанин, кој имал намера да отпатува за Лондон, царинските службеници откриле 114 штеки цигари без акцизни маркички од марката „карелиа“, како и пет штеки цигари со бугарски акцизни маркички од марката „собрание“.
Цигарите во куферот на патникот биле пронајдени откако аеродромската служба пријавила дека тој има тежок багаж. Цигарите, како што информираат од Царинската управа, се привремено задржани, а против патникот ќе биде поведена прекршочна постапка.
На граничниот премин „Блаце“, за влез во земјата, во автомобил со косовски регистарски таблички, цариниците пронашле 53 свечени фустани.
„Возачот првично не застанал на царинска контрола, но по реакција на царинските службеници, бил вратен назад, по што бил извршен детален преглед. Притоа во три вреќи сместени зад задните седишта и две кеси сместени под совозачкото седиште, биле пронајдени непријавените фустани кои се привремено задржани“,
се додава во соопштението.
На истиот граничен премин, но за излез од државата, при контрола на автомобил со косовски регистарски таблички, управуван од турски државјанин, царинските службеници откриле 350 маици со кратки ракави. Непријавените производи, за кои возачот изјавил дека се набавени во Турција, а за кои не поседувал никаков документ, биле пронајдени во патна торба и повеќе пластични кеси сместени на задното седиште и во багажниот простор. Маиците привремено биле задржани, а против возачот ќе биде поведена прекршочна постапка.
Од Царинската управа информираат дека службениците во текот на минатата недела, на царинската испостава „Скопје 3“, откриле и употребувана стока со потекло од Швајцарија, а која не била опфатена со царинските документи.
„Откриени се девет употребувани моторни возила (четирицикли, мотоцикли и скутери), четири електрични инвалидски колички, 42 употребувани звучници, 21 употребувана гума, еден употребуван фрижидер, една употребувана надворешна единица за климатизер, 35 употребувани метални држачи и еден гумен базен, со вкупна вредност од околу 2,3 милиони денари“,
се наведува во соопштението од Царина.
Производите, кои не биле опфатени со царинските документи, се привремено задржани, а против увозникот, физичко лице од Скопје, ќе биде поведена соодветна постапка, додаваат од Царинската управа.