Покрај инцидентот пред полициската станица, демонстрантите вечерва го пробија полицискиот кордон и пред зградата на Претседателството во Србија, каде што извикуваа пароли против претседателот Александар Вучиќ. Тој, пак, рече дека не знае дали тие се проруски, но оти е сигурен дека се антисрпски
Протестот на десничарите во Србија заврши пред полициска станица во Белград каде што наводно се наоѓаат приведени лица кои требало да учествуваат на протестот.
Насобраните демонстранти кои ја опколија полициската станица се разотидоа откако нивни претставници разговарале со полицајците.
Во еден момент пред полициската станица имаше и инцидент кога пратеникот Александар Јерковиќ бараше да влезе внатре и да ја види наводно уапсената бремена жена. Кога полицијата не му дозволи, Јерковиќ, како што јавува Н1 ТВ, се обидел со сила да се пробие низ полицискиот кордон.
Тогаш пред станицата излегол полицискиот командир и го известил пратеникот дека внатре нема никаква бремена жена. Исто така, од полицијата им тврдеа на демонстрантите дека две приведени лица – учесници на протестот, не се наоѓаат во станицата.
Претходно, српските медиуми јавија дека во пресрет на протестот бил приведен и припадник на ултрадесничарската група „Народни пароли“ од Бачка Паланка, Дејан Бобочек, кај кого била пронајдена пушка со оптички нишан и муниција.
Вечерашниот протест кој српските десничари го организираа против француско-германскиот предлог за Косово, започна околу 18 часот пред споменикот на рускиот цар Николај. Пред да заминат кон полициската станица, демонстрантите протестираа и пред зградата на Претседателството каде што го пробија полицискиот кордон и извикуваа „Каде е Вучиќ“ и „Предавство, предавство“.
Тие побараа српскиот претседател да си поднесе оставка или да ја промени политиката кон Косово. Извикуваа „Косово е срцето на Србија“ и пееја патриотски песни. Со себе носеа српски, но и руски знамиња, како и транспарентни со пораки: „Нема предавање“ и „Кој го издаде Косово, ќе ја издаде и Русија“.
По тензиите кои можеа да се забележат, претседателот Александар Вучиќ свика и вонреден состанок со клучните луѓе од безбедносниот сектор, а во обраќање до јавноста рече дека протестот не заслужува внимание. Сепак, им посвети внимание на демонстрантите и рече дека ништо не е случајно додавајќи дека поддржувачи на ваквите демонстрации се четири парламентарни партии.
За демонстрантите рече дека не знае дали се проруски, но е сигурен дека се просрпски.
Пред граѓаните настапи со уверување и дека државата нема да дозволи насилници и екстремисти со каква било заштита од странство да го рушат уставниот поредок на Србија.