По извршено вештачење на стоката, утврдено е дека се работи за прекурсори кои се користат за производство на некои видови дроги како кокаин, хероин и амфетамински тип дроги, велат од Царинската управа
Во возилото на словачки државјанин, инспектори од мобилните царински тимови од Секторот за контрола на истраги при претрес, при влез на ГП „Табановце“, нашле и заплениле поголема количина на прекурсори за производство на дрога, соопштија денеска од Царинската управа.
„На 10.12.2023 година на граничниот премин ‘Табановце’ за влез во Република Северна Македонија при преглед на патничко моторно возило со словачки регистарски ознаки во багажниот простор од страна на царинските инспектори се пронајдени четиринаесет лимени канти со вкупно 126 литри прекурсори на дрога од кои 10 лимени канти со налепница TOLUEN LAKARSKY со тежина од по 9 литри и четири лимени канти со налепница ACETON со тежина од по 9 литри. По извршено вештачење на стоката, утврдено е дека се работи за прекурсори кои се користат за производство на некои видови дроги како кокаин, хероин и амфетамински тип дроги“,
соопштија од Царинската управа.
Оттаму велат дека против лицето е поднесена кривична пријава до надлежното Основното јавно обвинителство за сторено кривично дело неовластено производство и пуштање во промет на наркотични дроги, психотропни супстанции и прекурсори, казниво по член 215 од Кривичниот законик.