Со едноминутно молчење и полагање свежо цвеќе на спомен-обележјата кај катлановско Блаце и пред Командата на воздухопловниот ВИНГ, а комеморативна церемонија имаше и во меморијалниот парк во базата Бутмир во Сараево
Потполковник Тони Спасовски, мајор Горан Ристовски, капетаните Бране Спасовски и Игор Ѓорески, наредниците Славчо Василев и Тони Давитковски, постарите водници Јанко Шириќ и Александар Тасковски, водниците Мики Ивановски и Александар Васиќ и десетарот Златко Вељаноски.
Ова се имињата на 11 припадниците на воздухопловниот ВИНГ при АРМ кои на денешен ден пред 15 години во хеликоптерска несреќа кај Блаце ги загубија животите враќајќи се од мисијата АЛТЕА во Босна и Херцеговина.
Со едноминутно молчење и полагање свежо цвеќе на спомен-обележјата кај катлановско Блаце и пред Командата на воздухопловниот ВИНГ, денеска нивните семејства, колеги, претставници на Министерството за одбрана и Генералштабот, им оддадоа почит.
Во делегацијата од Министерство за одбрана и Генералштабот во Блаце денеска присуствуваа заменик-министерот Башким Хасани и директорот на Генералштабот, генерал-мајор Зоран Милевски, а имаше и претставници од кабинетот на претседателот, од Општина Петровец, Командата за операции, воздухопловниот ВИНГ и првата пешадиска бригада.
„Петнаесетгодишнината од хеликоптерската несреќа, беше одбележана од страна на припадниците на воздухопловниот ВИНГ и пред спомен-обележјето во касарната ‘Страшо Пинџур’ во Петровец“,
соопштија од Министерството за одбрана.
Почит на загинатите им беше оддадена и во базата „Бутмир“ во Сараево, во меморијалниот парк со комеморативна церемонија во чест на единаесетте загинати припадници од македонскиот контингент во мисијата АЛТЕА во БиХ.