Викендов на плоштадот „Македонија“ беше поставена новогодишната елка, а има и штандови во кои се продаваат пијалаци и украси, како и детски реквизити. На околните дрвја се поставени светилки и тоа е сето украсување што Градот го има досега
Скопје, на две недели пред прославата за Нова Година, почна да се украсува. Викендов на плоштадот „Македонија“ беше поставена новогодишната елка, а има и штандови во кои се продаваат пијалаци и украси, како и детски реквизити. На околните дрвја се поставени светилки и тоа е сето украсување што Градот го има досега. Непознато е и дали на последниот ден од оваа година на плоштадот ќе пристигне Дедо Мраз, дали ќе има забава за децата, кои изведувачи ќе ги забавуваат скопјани вечерта на 31 декември.
Скопската градоначалничка Данела Арсовска досега неколкупати најавуваше дека ќе одржи посебна прес-конференција во врска со ова прашање, а и во гостување во емисијата „360 степени“ потврди дека Скопје ќе биде украсено за претстојните празници. Други детали не се откриваат.
Минатата година новогодишното украсување во главниот град почна на 16 декември.
Тогаш градоначалничката Данела Арсовска, која на функцијата беше само околу еден месец, одлучи да го раскине договорот што Град Скопје го потпишал со фирмата „Линк медиа плус“ за новогодишно украсување на главниот град во мандатот на нејзиниот претходник Петре Шилегов. Како причина за раскинувањето на договорот беше наведена енергетската криза.
За годинава, пак, беше најавено дека нема да се применува досегашната практика на најмување фирма што ќе го украсува Скопје, туку дека Градот ќе купи сопствени украси и на тој начин ќе заштеди пари од буџетот.