Немаме отворени прашања со Северна Македонија, сè додека не се разговара за тоа чие вино е подобро, се пошегува српскиот претседател Вучиќ откако со Пендаровски посетија винарија во Врање. Двајцата претседатели потоа одиграа партија шах за која рекоа дека се договориле да помине нерешено
Откако во манастирот „Свети Прохор Пчински“ заеднички учествуваа во одбележувањето на 2 Август, Денот на Републиката – Илинден, претседателот Стево Пендаровски и неговиот српски колега Александар Вучиќ со државен авион продолжија на работен ручек во Врање.
Српскиот претседател оттаму уште еднаш порача оти Северна Македонија и Србија немаат никакви отворени прашања, освен едно – која земја има подобро вино.
„Немаме отворени прашања со Северна Македонија, сè додека не се разговара за тоа чие вино е подобро. Го донесов нашиот гостин Стево Пендаровски во винаријата ‘Алексиќ’ со надеж дека ќе го затвориме ова прашање еднаш засекогаш!“,
се пошегува на Инстаграм српскиот претседател.
По поставената дилема за тоа која земја има подобро вино, двајцата претседатели одиграа партија шах.
„Пријателска партија шах. Се договоривме да биде нерешено“,
напиша претседателот Пендаровски во објавата на Инстаграм.
Неговиот српски колега Вучиќ, пак, напиша:
„Одигравме добра партија шах.“
Претседателот Стево Пендаровски и српскиот претседател Александар Вучиќ денеска со обиколка на манастирот „Прохор Пчински“ и заедничка литургија на Македонската и Српската православна црква, учествуваа во одбележувањето на празникот Илинден.
Вучиќ во обраќањето порача дека двете држави имаат исклучително добри односи кои очекува и во иднина да се развиваат. Tој потенцира дека меѓу Србија и Северна Македонија нема отворени прашања, потсетувајќи на одлуката за признавање на автокефалноста на МПЦ.
Претседателот Пендаровски се заблагодари на пречекот и, како што рече, на личните заложби на Вучиќ што Србија овозможи повторно чествување на Илинден во манастирот „Прохор Пчински“.