Имаше оставен кревет и елементи од кујна и друг вид мебел. Пред 18 часот некаде се појави пожар, најверојатно намерно ги запалија остатоците од мебелот, велат станарите
Тетовските пожарникари попладнево пред 18 часот интервенираа на пожар што избувнал на оставен мебел пред контејнер, при што огнот го зафатил и ѕидот од зградата на улицата „Страшо Пинџур“ кај трговскиот комплекс „Ловец“. Од тетовската територијална противпожарна единица информираа дека тројца пожарникари со едно возило успееле да го ликвидираат пожарот.
„Имаше оставен кревет и елементи од кујна и друг вид мебел. Пред 18 часот некаде се појави пожар, најверојатно намерно ги запалија остатоците од мебелот. Во еден момент огнот беше толку силен што го зафати и контејнерот и ѕидот од зградата. Можеше да биде уште поопасен пожар, насекаде тука има кабли и инсталации. Среќа интервенираа пожарникарите на времено“,
информираа станарите од зградата на улицата „Страшо Пинџур“, јави дописникот на МИА.
За пожарот била повикана и полицијата за да изврши увид на самото место.