Сè уште неофицијалната победа, Вучиќ синоќа ја прослави со своите сопартијци во изборниот штаб на партијата со блех-оркестар и шампањ, а она што предизвика внимание во јавноста е тоа што на прославата, во форма на торта, се појави фигурата на Вучиќ како излегува од фрижидер – главниот симбол што ја одбележа предизборната кампања на српскиот претседател
По објавувањето на прелиминарните резултати, актуелниот српски претседател Александар Вучиќ синоќа ги прослави вториот освоен претседателски мандат и убедливата победа на неговата Српска напредна партија (СНС) на изборите што се одржаа вчера во Србија.
Сè уште неофицијалната победа, Вучиќ синоќа ја прослави со своите сопартијци во изборниот штаб на партијата со блех-оркестар и шампањ.
Она што предизвика внимание во јавноста е тоа што на изборната прослава, во форма на торта, се појави фигурата на Вучиќ како излегува од фрижидер – главниот симбол што ја одбележа предизборната кампања на српскиот претседател.
Првиот пат кога претседателот Александар Вучиќ не само метафорички туку и буквално излезе од фрижидер беше во неговиот предизборен спот. Тогаш тој, излегувајќи од фрижидерот во станот на млада брачна двојка, почна да ги набројува постигнатите успеси.
Спотот предизвика бурни реакции не само во Србија туку и на целиот Балкан, а Вучиќ оттогаш не престана да „излегува од фрижидер“.
Следниот пат, кога српскиот претседател ја искористи истата шега, излегувајќи од фрижидер, беше на само неколку часа пред почетокот на предизборниот молк, на два дена пред одржувањето на изборите. Овој пат тоа го направи во телевизиска емисија на ТВ Пинк, каде што беше гостин.
Водителката во текот на емисијата ја отвори врата од фрижидерот и оттаму излезе Вучиќ, кој во рацете држеше тегла со корнишони.
Вучиќ, меѓу другото, на синоќешната прослава во изборниот штаб на партијата истакна оти успеал да направи нешто што никому во Србија не му успеало.
„Јас сум единствениот што победил двапати во првиот круг“,
изјави синоќа актуелниот претседател на Србија, Александар Вучиќ, прогласувајќи победа на изборите.