Поради метежот пред поликлиниката „Јане Сандански“ во Скопје, превентивно интервенираше полицијата, а досега нема пријава за инциденти. Филипче најави дека ќе се бара механизам за одржување на ред пред пунктовите за вакцинација, а ако треба, вели дека ќе се ангажира и Армијата
Со турканици и гужви пред поликлиниките во Скопје започна првиот ден од вакцинацијата против ковид-19 без закажување термин.
Поради големиот број граѓани кои чекаа ред за вакцина пред поликлиниката „Јане Сандански“, превентивно интервенираше полицијата, а од МВР велат дека досега не се пријавени инциденти.
Коментирајќи ја денешната слика пред здравствените установи, министерот за здравство, Венко Филипче, рече дека гужвите се веројатно поради тоа што граѓаните сакаат да се вакцинираат во раните утрински часови. Тој најави дека во координација со директорите на здравствените институции ќе се бара механизам за одржување на ред пред пунктовите за вакцинација, а ако треба, вели дека асистенција ќе се бара од Армијата.
„Претпоставувам дека граѓаните сакаат да завршат работа порано додека е студено. Незнам дека имало инцидент. Се надевам дека нема да има. Мислам дека е добар систем да продолжиме без закажување за да биде што поголем интересот, пристапот, граѓаните во кој било дел од денот да можат да дојдат и да не бидат вратени и да се вакцинираат. Ќе разговарам со директорите на сите здравствени домови да видиме како да се организира редот. Ние се уште ги користиме ресурсите на Армијата и имаме механизми со кои можеме да направиме таков ред. Ќе видиме денешниот ден како ќе помине па кај треба ќе интервенирани“,
рече Филипче.