Претходно денеска во изјава за медиумите премиерот Христијан Мицкоски изјави во Брисел не оди за да го презентира Планот за раст, туку, како што рече, за да ја претстави фрустрацијата што ја чувствуваат македонските граѓани
Меѓународните односи и имплементацијата на Планот за раст на регионот ќе бидат теми на разговор на утрешниот работен ручек што претседателката на Европската комисија, Урсула фон дер Лајен, ќе го одржи со лидерите на шесте држави од Западен Балкан.
На работниот ручек, како што информираа денеска од ЕК, поканети се премиерот на С Македонија, Христијан Мицкоски, на Албанија, Еди Рама, на Косово, Албин Курти и на Црна Гора, Милојко Спајиќ, претседавачката на Советот на министри на Босна и Херцеговина, Борјана Кришто, и претседателот на Србија, Александар Вучиќ.
Европската комисија информира дека во моментов ја финализира проценката на доставените реформски агенди на земјите од Западниот Балкан поврзани со Планот за раст кои се однесуваат на социо-економските аспекти и на областа на основните права.
„Кога ќе ги завршиме овие проценки, ќе се консултираме со земјите членки на претстојниот ИПА Комитет и во случај на позитивна оценка од страна на ИПА Комитетот, ќе ги одобриме реформските агенди“,
истакна портпаролката на ЕК, Ана Писонеро, и додаде дека по ова ќе следи подготовката за исплата на првите транши од Инструментот за раст и реформи на Западниот Балкан.
Покрај работниот ручек со шефицата на Европската комисија, на агендата на премиерот Христијан Мицкоски, кој од денеска до петок ќе биде во работна посета на Брисел, се и состаноци со претседателот на Европскиот совет, Шарл Мишел, еврокомесарот за проширување Оливер Вархеји, како и со генералниот директор на генералниот директорат за соседство и преговори за проширување (ГД НЕАР) Герт Јан Компан.
Во друштво на премиерот во Брисел ќе бидат и министрите за надворешни работи и надворешна трговија и економски прашања, Тимчо Муцунски и Орхан Муртезани.
„Оваа дипломатска средба на претседателот на Владата е со цел интензивирање на досегашната соработка и е важна за процесот за пристапување на Северна Македонија кон Европската Унија. На состаноците ќе бидат опфатени низа прашања кои се однесуваат на регионална стабилност, зголемена економска соработка, усогласување на реформите со европските стандарди, владеење на правото и бескомпромисната борба на Владата против корупцијата и криминалот“,
соопштија попладнево од Владата.
Претходно денеска во изјава за медиумите Мицкоски изјави во Брисел не оди за да го презентира Планот за раст, туку, како што рече, за да ја претстави фрустрацијата што ја чувствуваат македонските граѓани.