Според неа, проширувањето е инвестиција во стабилноста, инвестиција во сигурноста, но и инвестиција во просперитетот на целиот континент и голема инвестиција во демократијата. Вели дека силно ја потврдуваат нивната посветеност на иднина во која сите шест партнери од Западниот Балкан ќе бидат членки на Унијата
Цел на Европската комисија е Северна Македонија и Албанија да ги почнат преговорите по Првиот кластер – Основи што е можно поскоро, дури ако може и следната недела и силно ја потврдуваме нашата посветеност на иднина во која сите шест партнери од Западниот Балкан ќе бидат членки на нашата Унија, изјави денеска претседателката на Европската комисија, Усрула фон дер Лајен, по завршувањето на дводневниот Самит на ЕУ, на заедничката прес-конференција со претседателот на Европскиот совет, Шарл Мишел, и шпанскиот претседател Педро Санчез.
„Новата година почнува со многу добри вести за Европската Унија и за нејзините соседи и пријатели со вчерашната одлука за чекор напред во процесот на проширување. Тоа ќе претставува обележје на нашата заедничка историја. Решивме да започнеме преговори со Украина и Молдавија, одлучивме на Грузија да ѝ доделиме кандидатски статус, како и да ги отвориме преговорите со Босна и Херцеговина, тогаш кога ќе бидат постигнати неопходните барања“,
истакна Фон дер Лајен.
Според Фон дер Лајен, со вчерашната одлука за проширувањето Унијата покажала дека го исполнува ветеното и оти никогаш не била посилна.
„Во свет што го потресуваат повеќекратни кризи, проширувањето е инвестиција во стабилноста, инвестиција во сигурноста, но и инвестиција во просперитетот на целиот континент и голема инвестиција во демократијата“,
додаде Фон дер Лајен.
Според Шарл Мишел, воената агресија на Русија врз Украина предизвика длабока трансформација на Европската Унија, за што доказ е и денеска завршениот Самит, кој има историска димензија со донесените одлуки за проширувањето.
„Ваквите одлуки се многу јасна политичка порака дека проширувањето е инвестиција во мирот, сигурноста и просперитетот, упатена до сите европски граѓани и до граѓаните на земјите кандидати за членство, но и остатокот од светот“,
додаде Мишел.
Санчез, од своја страна, истакна дека на 1. јули кога беше во посета на Киев му порачал на украинскиот претседател Володимир Зеленски дека за шест месеци сите членки и институции на ЕУ ќе го поддржат членството на Украина во Унијата и конечно на крајот на претседавањето на Шпанија со Унијата, вчера е донесена таква одлука.
Тој додаде дека посветеноста на проширувањето не се однесува само на Украина, туку и на Молдавија, на земјите од Западниот Балкан, како и Грузија, доколку ги исполнат неопходните услови.
„Има многу земји што сакаат да се приклучат на европското семејство веќе подолго време и тоа ќе биде можно со поддршка и помош од ЕУ и европските институции“,
истакна Санчез, додавајќи дека и Романија и Бугарија се многу важни за Унијата и дека се надева оти наскоро ќе се приклучат на Шенген-зоната.
Шефовите на држави или влади на земјите членки на ЕУ вчера за време на Самитот на Унијата во рамки на дебатата за проширувањето на ЕУ, ги усвоија и Заклучоците за процесот за нашата земја во кои се посочува дека Европската Унија е подготвена да ја комплетира фазата на отворање на пристапните преговори со Северна Македонија, веднаш штом земјата ја спроведе својата заложба за усвојување на уставните измени, во согласност со нејзините внатрешни процедури, како што е наведено во одлуките на Советот на ЕУ од 18 јули 2022 година.
Вчера и премиерот Димитар Ковачевски рече дека овој ден за Северна Македонија можеше да биде победнички ден во кој земјата по успешниот скрининг успешно и брзо продолжува со отворање на поглавјата и евроинтеграцискиот процес.
Според него, огромна штета е што опозицијата во земјата е главен кочничар на европската иднина на државата. Граѓаните, рече премиерот, со денешниот ден и конкретно можат да се уверат дека со вакво анти-ЕУ и анти-НАТО позиции на опозиција, тие ќе бидат лишени од можноста забрзано да се приклучат на прогресивното европско семејство.